Ram tana inlan leh hnial lo Ribery

Bayern Munich attac-ker Franck Ribery chuan kumina an ramin Euro 2016 a thlen turah inlan a hnial lo niin a lang a, coach Didier Deschamps nen inbiakna neih a hreh loh thu a sawi.

Kum 32-a upa Ribery hian a hnungzâng na vangin 2014 FIFA World Cup kha a khel thei lo a, hemi hnu hian international football a chawlhsan nghal. Ribery hi hliam vanga a inkhelh theih loh reng hnuah kumin February thla aṭang khan khelmualah a hmel kan hmu leh ṭan tawh.

France tana match 81 lo khel tawhtu Ribery chuan, "Deschamps-a'n ram tana khel tura a ṭha thei ang ber player thlan a duh thu ka lo hria a. Tunah hian Bayern tan ṭha takin ka khel leh thei tawh a, 100%-in ka fit leh tawh. Ram tana inlan leh tur chuan coach nen inbiakna neih a ngai hmasa ang," tiin a sawi.

Ribery-a'n ram tana a khelh hnuhnung ber chu kum 2014 daih tawh kha a ni, kuminah hian Group A-ah Romania, Albania leh Switzerland te nen an awm.