Dortmund hmachhawn tur Spurs hna a hautak dawn

Zanin dar 1:35 hian UEFA Europa League Round of 16 second leg khelh tur a ni a, Tottenham chuan White Hart Lane-ah Borussia Dortmund an lo mikhual ang a; Gary Neville-a enkawl Valencia leh Athletic Bilbao te pawh Mestalla-ah an inhmachhawn dawn bawk a ni.

Spurs hna a hautak

Signal Iduna Park-ah Dort-mund hian Tottenham hi Pierre Emerick-Aubameyang-a goal khat leh Marco Reus goal hnih khung hmangin 3-0 in an lo sawp tawh a, quarterfinal lut tur chuan Spurs hian goal thum aia tam an khung a ngai tawh a ni.

Kum 2016 bikah Dortmund hian result an nei ṭha tluang hle a, vawi khat mah chak loh an la nei lo, an match hnuhnung berah Mainz chu 2-0 in an hneh nghe nghe.

Tottenham pawh hian tun hnai-ah a zawna match thum chhung chak ni hmel an hmuh loh hnuah an match hnuhnung berah Aston Villa chu 2-0 thoin an hneh ve leh tawh a, beiseina tlem chu an nei ang. Hetihlai hian Spurs manager Mauricio Pochettino-a'n first leg-a a player thlan dan aṭangin Europa aiin Premier League-a ngai pawimawh zawk tih a lang tawh a, zaninah pawh hian player ṭha ṭhenkhat a chawlhtir a nih pawhin a mak lo ang.

Spurs hian an si phurh sut zawh an tum a nih chuan Harry Kane chu tlarhmaah an chhawr thei ang a, England international bakah hian Erik Lamela leh Heung-min Son te pawh chhawr theih an ni.

Hetihlai hian Dortmund lam pawhin an player ṭha Mats Hummels bakah attacking trio Marco Reus, Henrikh Mkhitaryan leh Aubameyang te chu inkhel bul an ṭan tir tura ngaih a ni bawk.

Chak thei lo Valencia

Manchester United defender hlui Neville-a enkawl Valencia hian tun hnai an match hnuhnung pangaah chak ni hmel an hmu lo mai pawh niloin an tlawm vek a, zanina an mikhual tur Athletic Bilbao pawh hi first leg-ah 1-0 in an lo hneh lo tawh.

Zanina Valencia inngahna tur chu an khelmuala an record neih ṭhat ve hi a ni ang, Mestalla-ah Europa League bikah an match khelh hnuhnung pasarihah chak loh an nei lo a, an match hnuhung berah chuan Rapid Vienna 6-0 in an sawp nghe nghe.

England international hlui Neville chuan, "Bilbao hi team ṭha tak an ni a, an player mal te te pawh hian theihna sang tak an nei hlawm. Inkhelh hmasa khan chak lo zawkah ṭang mah ila hneh let theihna hun kan nei turah ka ngai. Goal khat chauh a la nih avangin thil tih theih loh tawp a la ni bik lo a, kan theihna zawng zawng sawm khawmin mikhual kan lo thleng ang," tiin hnehna chan let theih a inbeisei hle.

Zanin vek hian German club Bayer Leverkusen chuan first leg-a 2-0 a an lo hneh loh tawh Spanish club Villarreal an lo mikhual dawn. Leverkusen coach Roger Schmidt-a'n hneh let theih inbeisei mah se defender Tin Jedvaj chu hrem vanga a chhawr theih dawn loh bakah hliam vangin Charles Aranguiz (ke phah) Sebastian Boenisch (ṭhâl), Roberto Hilbert (dar), Kevin Kampl (chawn), Lars Bender (ṭhâl) leh Omer Toprak (ṭhâl) te an inkhel thei dawn lo a, hnehna chang let turin beisei a tam lutuk lo maithei.