Old Trafford-ah Europa League Last 16 thawh hnihna Manchester United Vs Liverpool

Liverpool-in Daniel Stur-ridge leh Roberto Firmino te goal hmangin Anfield-ah Manchester United 2-0 in an hneh a, Europa League quarterfinal thleng turin Old Trafford-a goal chhuah loh a tawk. Zanin dar 1:35 hian English club inhal pahnihte hi an intawng dawn a, Ten Action-ah a en theih ang.

Manchester United ṭantuten first leg an khelh dan aṭanga an thlir a nih chuan Europa League zin kawng hi a tawp tawhah an ngai ang a, Liverpool ṭantute chuan goal engzat nge an khung belh dawn tih an ngaihtuah thung ang.

Dinhmun ṭha Reds

England international mid-fielder James Milner-a'n Anfield-ah damlohna vangin United a hmachhawn thei lo a, zaninah erawh a inlan theih ngei beisei a ni. Reds hian Daniel Sturridge, Philippe Coutinho, Roberto Firmino leh Adam Lallana te hmangin goal khungna chance ṭha hnem tak an insiam a, Milner-a'n a rawn belh bawk chuan an ṭha sawt ang.

Liverpool hian an mualah goal an chhuah lo a, Old Trafford-ah goal an khung a nih chuan United hian chak turin goal li tal an khung a ngai dawn. Louis van Gaal-a hote hian penalty hruai thleng turin goal hnih an mamawh a, chak tur chuan goal thum an mamawh.

Reds an phur

Liverpool-in League Cup final-ah penalty shootout hmangin Manchester City hneh lo mah se phur tharna an chang a, league-ah City hi 3-0 in an sawp chhunawm a, Crystal Palace laka goal khat an chhuah hnuah an lehthal leh bawk.

An match hnuhnung bera United an sawp hnuah an awl vang vang a, zanin inkhel tur hian kar khat tawp inpuahchahna hun a nei a, an chak lo a nih pawhin quarterfinal tling tura rinkai an ni.

United hian Reds an hneh loh hnuin an mualah West Ham an draw hram a, FA Cup semifinal thleng turin replay an khelh a ṭul phah. Red Devils ṭantute tana thu lawmawm chu Van Gaal-a kaihhruaina hnuaiah Liverpool hi league-ah vawi li hmachhawnin an hneh vek a, a pawi lai ber erawh zanina a inhmachhawnna tur hi Europa League a ni.

Beiseina nen

Manchester United-in 2014 FIFA World Cup-a Germany champion pui thei midfielder Bastian Schweinsteiger an kawl a, German midfielder hi a dam tawh. Theihtawp chhuah ṭhin midfielder hian Red Devils team chhungah huaisenna a rawn pek a rinawm a, match hmasaa hrem vanga khel thei lo Jesse Lingard a rawn kir bawk ang.

Van Gaal hian captain Wayne Rooney bakah Luke Shaw, Cameron Borthwick-Jackson, Phil Jones, Ashley Young leh Will Keane te inhliam vangin a chhawr thei lo ang.

Eng tin zel?

Germany-ah club pahnih manager te hi an intawng ṭan a, Dutch manager hian Germany club ropui ber Bayern Munich enkawlin Bundesliga match hnihah tunhnaia Bayern elpha ber Jurgen Klopp-a enkawl Dortmund chu league-ah a hneh a, German manager hian Van Gaal hi vawi hnih a hneh let bawk.

England-ah thawnthu ngai bawk kan hmu a, Van Gaal-a'n tun dinhmuna England club lian zawk United enkawlin Klopp-a enkawl Reds vawi khat a hneh a, hetiang zat bawk hi German manager chak zat a ni.

Jurgen Klopp chuan, "Din-hmun ṭha takah kan ding a, mah se quarterfinal kan la lut chiang lo. Anfield-a kan khelh ang bawka kan khelh leh a ṭul a ni," tiin round sang zawk an la luh bik loh thu a sawi.