Liverpool Academy-ah Mizo naupang

Indian football-ah Mizo hming a langsar zel a, LFC International Aca-demy – DSK Shivajians a awm mek Jerry Mawihmingthanga leh Lallianzuala Chhangte-te chuan Liverpool-ah kar khat chhung atan training an nei.

Mizo naupang pahnih hian March 14 aṭang khan Liverpool-ah hun an hmang ṭan a, an ni hmasa berah hian Reds training ground Melwood-ah James Milner leh Philippe Coutinho-te kaihhruaina hnuaiah inzirna neiin Reds manager Jurgen Klopp-a kaihhruaina hnuaia Liverpool first team training chu an chhim bawk.

Jerry leh Zuala-te hi LFC-DSK Aca-demy aṭanga Liverpool Academy-a training nei tura thlan hmasak ber an ni a, Academy tana an khelh ṭhat bakah India junior leh senior team tana an khelh ṭhat vanga he hun duhawm hi nei thei an ni.

DSK group executive director Shirish Kulkarni chuan, "Kan academy-a an tihṭhat vanga kan nauten Liverpool Academy-a inzirna hun an nei thei hi a lawmawm a, Indian football kal zelna atan Jerry leh Zuala-te hian kawng an hawng a ni," tiin a lawm hle.