Champhaiin semifinal an lut

2016 MFA Cup-ah Champhai aiawh Zotlang FC-in nimin khan New Serchhip FC 4-0 a sawp-in semifinal lut hmasa ber an ni. Vawiin hian Khawtetlang Field, Serchhip-ah Group B team-te a inlan dawn a, chhun dar 12:30-ah Young Learners FC leh Siaha FC te an inkhel ang a, Rengtekawn FC leh Chhinga Veng FC te tlai dar 2:30-ah an inkhel leh ang.

Group A thlirna

Nimin inkhel hmasa zawkah Mamit DFA aiawha kal Venghlun FC chuan Lunglei DFA aiawh Zotlang FC chu Dennis Zonunmawia goal hmangin an hneh. Inkhel hnuhnung zawkah Champhai DFA aiawh Zotlang FC-in Lalhmuchhuaka goal hnih bakah Lalmalsawma leh Zonunthara te goal hmangin New Serchhip 4-0 in an sawp.

Champhai aiawh Zotlang FC-in an match hmasa bera Venghlun FC an hneh tawh avangin point ruk an hmu tawh a, hmahruaitu nichungin semifinal an lut chiang tawh. Team dang pathum Venghlun FC, Zotlang FC (LDFA) leh New Serchhip ten hmunruak pakhat hi an la inchuh ang.

New Serchhip-in Champhai club lakah goal li tehmeuh chhuah mah se Venghlun FC an hneh chuan semifinal an lut thei a. Lunglei Super League champion Zo-tlang FC tan semi-final lut turin an match hnuhnung berah la chak vek Zotlang FC an hneh a ngai a, inkhel pakhat zawk result an ngaihchan a
ṭul bawk ang.

Group B lam

Chhinga Veng FC-in an match hmasa berah Young Learners laka goal 10 an khung theih avangin Rengtekawn lakah harsatna an neih a rinawm loh. Siaha FC tan pawh Young Learners laka point thum hmuh a harsa bik lo ang.

Chhinga Veng leh Siaha hi an chak a nih chuan semifinal an lut chiang a, Inrinniah team pahnih hian group hmahruaitu an zawng ang.

Nimin Inkhel - Group A

Venghlun FC 1 - 0 Zotlang FC (LDFA)

Venghlun: Dennis Zonunmawia 58'

New Serchhip FC 0 - 4 Zotlang FC (CDFA)

Zotlang: Lalmalsawma 33'; Zonunthara 49'; Lalhmuchhuaka 62', 90+2'.

# Team Pld W D L GF GA GD Pts

1 Zotlang FC (CDFA) 2 2 0 0 8 2 6 6

2 Venghlun FC 2 1 0 1 3 4 -1 3

3 Zotlang FC (LDFA) 2 0 1 1 0 1 -1 1

4 New Serchhip FC 2 0 1 1 0 4 -4 1

Vawiin Inkhel Tur - Group B

12:30 PM Young Learners FC vs Siaha FC

02:30 PM Rengtekawn FC vs Chhinga Veng FC