Semifinal-ah TBL; Beisei nei BCA
Nilaini zanah Mizoram Super League Season 2-a Khatla TBL khelh ṭhat ber zan leh Zarkawt BCA khelh fuh lo ber ṭum a innang a, 78-56 in champion lai TBL an chak.
MSL club-te'n match li ṭheuh an khel tawh a, Khatla TBL-in Mission Veng Vikings leh Tuikual South hnungzuiin semifinal an lut. Semifinal hmun ruak pakhat hi Zirtawpni tlaia Zarkawt BCA leh Zarkawt Serpents chak zawk zawkin an hnawh khat ang.
Team thar TBL
Khatla TBL-in relegation playoff an khel thei tih hriain India captain Vishesh Bhriguvanshi leh Pratham Singh te chu BCA hmachhawn hman turin an chah thleng a, City Police a tling thar Gospel Lalthawmmawia leh R. Lalmalsawma te chu training-na aṭangin an la chhuak bawk.
Zarkawt BCA erawhin state pawn player an neih loh avangin chah luh tur an nei lo a, MSL2-ah City Police-a tling thar Dennis Lalmuanpuia an ziah luh loh avangin Chaltlang Ryders an hneh hnuah team tichak thei tur player thar an nei lo.
Khatla an chungnung
MSL1 MVP H. Laldinsanga'n inkhel bul ṭanin three points a lut nghal a, second rei lote chauh an khel nachungin inkhel kalhmang tur a hriat nghal. Khatla TBL squad ṭhatna lang zuiin quarter hmasa berah College Veng tlangval Papuia Hlondo a langsar a, quarter hnihnaah Mapuia leh Gospel-a ten basket ngah mah se Dawrpui Vengthar tlangval Lalrinzuala a hmuhnawm ber. Third quarter-ah Vishesh-a'n India captain danglamna a lantir a, quarter tawp ber chu captain Vanlalnunsanga show a ni.
Zarkawt BCA-in zan dang an pha lo lutuk hi a mak zawk a, tibuaitu nei lo chung pawha 'air ball' an neih fo te chuan an khelh chhiat zia a tilang a. Player hming langsar an zah lutuk niin a lang a, chak tumna an nei lo ang hialah a ngaih theih.
Zarkawt Derby
BCA coach R. Liansangpuia chuan an khel fuh lo tih a pha lo a, semifinal erawh luh ngei a la inring. Vanglaini palai hrilh-in Sangpuia chuan, "Zarkawt Serpents kan hneh chuan semifinal kan lut thei a, tunah chuan TBL kan khelh ṭuma kan khelh dan hi theihnghilhin Zarkawt Derby chauh kan thlir tawh ang," a ti.
Khatla TBL coach leh player ni kawp Mapuia chuan, "Min rawn belhtu player-te'n kan squad an ti chak a, kan khelh dan a lungngawithlak bawk. Tunah chuan kan squad a chak ṭha a, champion leh champion loh erawh sawi lawk theih a ni lo," tiin an khelh danah a lungawi thu a sawi.