Venus hnehtu Serena

Ningani zana Williams unau inkhelah a naupang zawk Serena chuan a u Venus chu 3-6, 6-3, 6-4 a hnehin Top Seed Open-ah quarterfinal a inhlangkai a, semifinal lut tur chuan Shelby Rogers a paltlang leh a ngai ang.

World number 1 hlui Serena hi tun hma pawhin a u lakah hian a chungnung zawk ṭhin, tun ṭumah pawh set hnuhnung ber an khelh laiin 4-1 in hniam zawk mah se game hnuhnung pali la zawnin a chak.

American star pahnih hi vawi 31 an intawnna chiah a ni a, record nei ṭha zawk Serena hi vawi 19 chakin Venus-i'n ṭum 12 hnehna a chang thung - an vanglai pel deuh tawh mah se an inkhel a la hmuhnawm hle.

Grand Slam vawi 23 champion tawh Serena chuan, "Eng tiang takin nge a tawp lamah khan ka chet ṭhat theih ka ka hrethiam lo zawk hial. Match tam takah chuan set hnuhnung ber ka khel fuh tawk lo ṭhin, tun ṭumah erawh a fuh ta hle. "Kentucky-ah hian champion tumin ka kal kher lem lo, inelna an buatsaih vawi khatna a nih avangin nuamti takin match ṭhenkhat khelh tum chauha kal ka ni, hun ṭha ka nei a nih erawh chuan ka bawhpelh lo ang," tiin a sawi.

August 31 aṭanga khelh tur US Open-ah Serena hi a inlan zui dawn a, Grand Slam nomawi 23 a kawl mek chu tih pun a tum dawn. Nomawi lian tham la hnem ber Margaret Court (24 titles) nih rual turin champion a mamawh.