Volleyball inziah luh hun a zo

Mizoram Volleyball Association (MVA) chuan 2020-21 season atan club leh player registration a hawn hun chu zawh fel a ni a, inelna sang pro division-ah mipa team panga leh hmeichhe team pali an awm dawn.

Mipa team-ah hian Hunthar, Chhinga Veng Spikers, Tuichangral, TNT leh Durtlang North an awm. Team hlun zingah Chanmari West chuan Covid-19 vanga harsatna an tawh vangin registration an ti thei lo. Hmeichhe lamah Durtlang, Bethlehem Vengthlang, Kanan leh Bungkawn te an awm thung.

Player ziah luh lamah Tuichangral chu che na bera ngaih an ni. An neih ṭhat sa David Lalramhmachhuana leh Lalrinchhana te an hum thei a, sulhnu nei ṭha Hunthar aṭangin Lalruatfela Sailo an lalut bawk.

Pro Volleyball League 2019-a team hmuhnawm Durtlang North-in player 18 an ziah luh zinga panga chu hnam dang an ni a, player langsar tak ziak lut lo mah se an neih sa - Zomuana, Tharnghaka leh Lalbiakmuana an hum thei hi chanchin ṭha a ni.

PVL champion lai Chhinga Veng Spikers chuan an neih sa bakah blocker Lianmawia an neih belh. Team hmuhnawm ni ṭhin TNT leh Hunthar te chuan hming lian leh langsar lakluh aiin an neih sa an tuaihriam chhunzawm dawn.