Arsenal tan Barcelona an thiam lua

Champions League cham-pion lai Barcelona chuan an nomawi humhim turin harsatna an la tawk lo. Nilaini zan khan an mikhual Arsenal chu 3-1 a hnehin quarterfinal an lut a, inkhel pahnih belhkhawmah Catalan club hian English club 5-1 in an sawp.

Emirates Stadium-ah Lionel Messi goal hnih hmangin Barca-in hnehna an lo chang tawh a, Nou Camp-ah pawh thil a danglam tam chuang lo. Messi, Luis Suarez leh Neymar ten goal an khung leh a, Gunners goal neih chhun hi midfielder Mohamed Elneny khung a ni thung.

Inkhel chu

Barcelona lamin goal hnih nei sa mah se a venhim aiin khung chhunzawm lan an ngai pawimawh zawk tih a lang a, Liverpool striker hlui Suarez hnen aṭanga a ball hmuh chu Brazil captain Neymar-a'n minute 18-naah an hmahruai nan a chhuih lut. Gunners tan Mohamed Elneny leh Alexis Sanchez te erawhin an hun
ṭha an chhawr ṭangkai lo thung.

Second half-ah Gunners-in an theihna zawng zawng an sawmkhawm a, minute 51-naah midfielder Elneny chuan goal khat a khung. Mahse, defender Dani Alves ball vawrh lo chang fuhtu Suarez chuan David Ospina tana dan ngaihna awm loin a hem lut a, goal ropui danglam bik a ni. Hun tawp hma hretin Messi-a'n mawi zetin a chip lut bawk.

Arsenal season

tawp chu March?

January 4 kha chuan Arsenal hi Premier League hmahruaitu an ni a, hemi hnu hian league match vawi kua an khelh leh tawh aṭangin ṭum hnih chiah hnehna an chang thei. Tun dinhmunah hmahruaitu Leicester City chu point 11 zetin an thlau mek, mah se Foxes ai hian match khatin an khel tlem zawk.

Carling Cup-ah Manchester City an champion tawh a, season hnih chhung an lo humhim ve tawh FA Cup nomawi pawh an hloh chiang tawh bawk. Kartawp khan Watford hneh loin quarterfinal aṭangin an tla a ni. North London club tan chuan March thla laihawlah hian season a tawp tawh ni berin a lang.

Amaherawhchu, manager Arsene Wenger hian Cham-pions Legue ai chuan league lamah beisei a la nei deuh zawk niin a ngaih theih a, kum 19 chauh a upa forward Alex Iwobi chu a vawi khat nan Champions Legue inkhel bul a ṭan tir a; Olivier Giroud leh Theo Walcott bakah tawnhriat ngah defender Per Mertesacker chu bench-ah ṭhutchawlh tir an ni.

Hneh theih loh Barca?

Tun dinhmunah chuan Luis Enrique a team hi hneh theih loh an ni. Barca hian a zawnin season kaw chhung Champions Legue quarterfinal an lut ta a, inelna hrang hrangah a zawnin match 38 chhung zet hneh loh an tawng tawh lo bawk.

Kum 1989 leh 1990 khan Italian club hlun AC Milan chuan European Cup hi a zawnin an lo la tawh a, hemi hnua Champions Legue tia hming thlak a nih hnuah eng team mah a zawnin an la champion leh lo. Catalan club hian club dang tih theih loh chu ti turin beiseina an nei mek.

Barca hian season hmasa khan Champions League, La Liga leh Copa del Rey nomawi an chawi vek a, kuminah pawh heng inelna pathumah hian champion thei an la ni vek. Spanish La Liga-ah point riatin hma an hruai fal tawh a, May thla khian Sevilla nen Copa del Rey final-ah an khel bawk ang.

Eng nge an sawi?

Arsenal manager Wenger chuan, "Team ṭha tak pahnihin inkhel hmuhnawm tak kan lantir a, a chak lo zawkah ṭang mah ila tun dinhmuna Europe-a team
ṭha ber kan hmachhawn miau avangin a mak hran lo. Barca tlarhmaa awm pathum khan an duh hunah chuan an pet goal thut thei vek emaw tih mai tur a ni a, dan an harsa a ni. MSN che vel kha chuan tih sual an nei lo tluk a ni a, midangin an tih ve theih ngai loh tur an lantir a ni," tiin MSN chu dan ngaihna awm lo khawpa hlauhawm leh thiam an nih thu a sawi.

Season hmasa Barca treble champion nihpuitu Enrique chuan, "Arsenal kha team
ṭha tak an ni a, an tlarhma an hlauhawm rualin tlarhnung pawh an khawng viau. Europe-a team ṭha 16 zingah chuan tupawh khelh awlsam an awm tawh lo a, kan theihna zawng zawnga kan khelh vangin hnehna kan chang," tiin a sawi.

Ngaihnawm

• Catalan club hian Champions League-ah Arsenal hi vawi khat chiah hneh loh an la nei a, vawi ruk hneh tawhin vawi hnih chu an inhnehtawk thung.

• Lionel Messi-a'n Cham-pions League record thar a siam a, club mal laka goal khung hnem ber a ni. Argentina captain hian Gunners lakah goal kua a khung tawh.

• Luis Suarez hi tun season-ah inelna hrang hrangah an club goal khung 61-ah a inrawh tawh a, goal 43 khung tawhin assists vawi 18 zet a nei tawh bawk a ni.