Europa League: United tan a awlsam dawn lo

Europa League semifinal khelh hun a thleng ta a, Pathianni zan dar 12:30-ah Manchester United chuan final luh inchuhin he inelnaa record nei ṭha ber Sevilla an hmachhawn dawn. 

Julen Lopetegui enkawlna hnuaia khel Sevilla hian game hmuhnawm an pho chhuak ṭhin a, kuminah pawh vawi nga an champion tawhna inelnaah hian nomawi an mitthla fel leh der tawh ang. 

Lopetegui chuan, "Khawvela team langsar ber kan hmachhawn dawn a, mahse United hmachhawn tur hian kan inbuatsaih dawn a ni," tiin quarterfinal-a Wolves an hneh zawhah a sawi a, United hneh dan tur a ngaihtuah fel tawh tura ngaih a ni. 

Sevilla hian Europa League quarterfinal-ah Wolves hi 1-0 in an hneh a, Manchester United-in F.C. Copenhagen chu 1-0 in an hneh hram bawk - harsa taka semifinal lut pahnih an intawng dawn a, a hmuhnawm ang. 

Tun hnaia United inchhuanna ber chu tlarhmaa Marcus Rashford, Anthony Martial leh Mason Greenwood an che ṭha hi a ni a, anni chawm tura Bruno Fernandes leh Paul Pogba an awm tak bawk avangin an hlim vanglai an tawng. 

Kum 18 mi lek ni mah se Greenwood hian tun season-ah goal 19 khungin assist vawi nga a nei tawh a, a kum anga en chi a ni lo tih a chiang. Rashford-a'n innghahna tlak a ni tih pholangin match 43-ah goal 22 khungin assist vawi 10 a nei bawk. 

Anthony Martial-a'n United-a zawm tirhin beisei phak lo mah se a theihna sanzia min hmuhtir zel a, tun season-ah goal 23 khungin assist vawi 12 ngawt a nei ta - tlarhmaa player pathumin tun season-a goal an thawhchhuah belhkhawm hi goal 91-a tling tawh tihna a ni!

Sevilla tan chak tur chuan tlarhma pathum ven ṭhat hi hna hmasa tur a ni dawn tih a chiang a, La Liga-a goal chhuah tlem pathumna ni phak team hian chelh dan tur hriaah an inngai ang - January-a United a zawm hnua Red Devils tana danglamna thlen thei Bruno an theihnghilh a thiang lo bawk. 

Kum hnih liam taah khan Champions League-ah team pahnih an intawng a, hetihlaia Jose Mourinho enkawlna hnuaia khel United hi Sevilla hian Old Trafford-ah 2-1 a hnehin last 16 aṭangin an pet chhuak. 

Old Trafford-a an intawn hma hian Spain-ah goal khung loin an inhnehtawk a, Mourinho-a'n a hna hmasa chu Sevilla playmaker Éver Banega dah ṭhat a ni tih a hria - second leg-ah Pogba leh Martial chu bench-ah a dah a, Nemanja Matic, Marouane Fellaini leh Jesse Lingard hmanga Banega thiamna chhut chah theih a beisei. 

Mahse, United midfield-in Banega an dah ṭha lo chiang hle - inkhel hmasa nena belhkhawmin vawi 17 zet chance a siam a, Old Trafford-ah United an hawihai. Pathianni zan inkhelah pawh Sevilla game chawi nungtu dah ṭhat hi Ole Gunnar Solskjaer-a'n hna pawimawhah a neih a ngai a, tihsual a rem lo ang. 

Sevilla-in ball an chang tam ṭhin a, tun season Europa League-a match tina an ball chan zat hi chawhrualin 66.3% a tling a, Wolves lakah khan 75% an chang thei - he inkhelah hian Banega-a'n vawi 103 zet pass dik a nei a, kha inkhela Wolves midfielder pathum pass dik zat belhkhawm chu 40 a ni!

Sevilla boss Lopetegui chuan, "Kan tih fo ṭhin angin kan theihna zawng zawng kan hlan ang. United hmachhawn hi a hautak dawn a, mahse kan hneh thei a ni tih rinna nen kan bei ang," a ti a, chak ngei a tum. 

Spanish club tana Lucas Ocampos ṭangkaina thai bo theih a ni lo a, kum 26 mi striker hian tun season inelna hrang hrangah match 42 khelin goal 17-a khung tawh a, assist vawi nga a nei thei. Sevilla hian tun season Europa League-a match 10 an khelhah vawi sarih goal chhuah loin hun an hmang a, United-in match 11-ah vawi riat goal an chhuah lo bawk - tlarhma player an neih ṭhat ve ve avangin hei hi a hmuhnawmna belhchhahtu tur a ni. 

Lopetegui enkawlna hnuaiah Sevilla hi La Liga-ah palina an ni a, Europa League semifinal paltlang lo mah se pressure a nei lo ang - Ole tan erawh Old Trafford-a a dinhmun sawh ngheh lehzual nan Europa League champion a pawimawh a, a elpui manager aiin pressure a nei na zawk.