Inkhel hautakah Rafael Nadal a chak

BNP Paribas Open khelh mekah Rafael Nadal chuan quarterfinal lut turin inkhel hautak tak a hmachhawn a, nimina last 16 inkhelah Alexander Zverev chu a hneh hram.

Indian Wells-ah Nadal hian set khatna chu la nghal mai mah se set hnih naah erawh game khat mah a la lo a, 6-7, 6-0, 7-5 in hnehna a chang. Spanish star Nadal hian a tawp lamah point 16 hmuh theih awm aṭangin point 15 zet a hmu zawna a chak ta hram a ni.

BNP Paribas Open vawi thum lo champion tawh Nadal hian quarter-final-ah chuan Kei Nishi-kori a hmachhawn leh ang a, a chak chho zel a nih chuan semifinal-ah world number 1 Novak Djokovic a hmachhawn thei dawn.

Kum 29-a upa Nadal chuan, "Kan inkhelh chhung zawng khan engtik lai mahin tha ka thlah lo a, ka theihna zawng zawngin ka hmachhawn a ni. Ka thawhrim vang chauhin hnehna ka chang," tiin inchhuang thei a nih bik loh thu sawi.

Inkhel dangah cham-pion lai Djokovic chuan Feliciano Lopez lakah harsatna tawk loin 6-3, 6-3 a hnehna changin quarterfinal a lut bawk. Serbian thiampuipa hian seeded pasarihna Jo-Wilfried Tsonga a hmachhawn leh ang.

Djokovic chuan, "Fe-li-ciano hi ban veilam hmangthiam a nih avangin hmachhawn a harsa hle a, a che vel kha a rangin a ball vuak a na bawk, min chhaih buai nasa hle. Tharum a ngah bawk avangin hmachhawn a harsa tak zet," a ti. Djokovic hian set hmasa berah Feliciano service aṭangin point li chiah a hmu thei a ni.

Kum 28-a upa Djo-kovic hian tun season-ah match 19 khel leh tawhin vawi 18 zet hnehna a chang leh tawh a, vawi khat chiah chak loh a la nei. A chak loh ṭum pawh hi Dubai-ah a mit (eye) nat vanga a inkhelh tluan theih loh vang a ni nghe nghe.

Tsonga hian last 16 in-khelah vawi 12 ace siam chungin darkar khat leh minute sarih chhungin Do-minic Thiem chu 6-3, 6-2 in a lo hneh ve bawk a ni.