Record thar siamtu Mizo tlangval Jeje

Mizo tlangval Jeje Lalpekhlua'n goal khung a bansan hleithei lo - Nilaini zan khan AFC Cup-a Mohun Bagan-in 3-2 a Yangon United an hnehna inkhelah goal hnih a khung a, Indian player zinga season khata AFC inelnaa goal khung hnem ber record a siam.

Guwahati khawpuia inkhelah hian Sony Norde leh Jeje-a te'n Bagan tan goal an khung hnu­ah Myanmar club-in Marcelo Fer­nandes goal hnih hmangin an si phurh sut mah se Mizo tlangval an dang zo lo a, Jeje-a'n minute 66-naah a goal hnihna khung lehin Kolkata club hnehna a chanpui.

AFC Cup match dangah India club Bengaluru-in hnehna an chang bawk a, Yangon khawpuia inkhelah Sunil Chhetri goal khat khung hmangin Ayeyawady United chu 1-0 in an hneh.

Bangalore club tan Mizo tlang­val Lalchhuanmawia Fanai chuan inkhel bul a ṭan a, second half-ah Daniel Lalhlimpuia chu a tlan lut bawk. Myanmar club tan Mizo keeper Vanlalhruaia chuan goal a veng bawk a, Hruaia hi Myanmar international a ni.

Bagan dinhmun

Mohun Bagan hi AFC Cup-ah Group G-ah awm mekin vawi thum inlan tawha an la chak vek a, inkhelh hmabak pathum an la nei.

Group H-a awm Bengaluru erawh vawi khat chiah hnehna la changin pahnihna an ni tho a, knockout stage lut turin beiseina an la nei ve zel.

Record thar chu

Hnahthial tlangval Jeje Lalpek­hlua'n tun season AFC Cup-ah match thum khelin goal nga a khung tawh a, AFC Champions Lea­gue playoff-ah goal khat a khung bawk avangin tun season continental club inelnaah goal ruk a khung tlinna chiah a ni.

India international striker hian Mizo tlangval Lalrindika Ralte leh Baichung Bhutia-te'n season khata goal li khunga record an lo siam tawh chu a lehpel a, record thar a chelh ta. Lunglei tlangval Didika hian kum 2013 khan AFC Cup-ah hian goal li a lo khung tawh.

Jeje leh goal

Tun season-ah Jeje-a'n Mohun Bagan tan match 15 a khel tawh a, goal kua a khung tawh. Tun season I League-ah match kua khel tawhin goal thum a khung a, league champion lai Bagan tan innghahna ber a ni mek.

Kum 2016 hnuah Jeje-a'n India tan match khat a khel a, SAFF Cup final-a Afghanistan 2-1 a an hneh ṭumin goal khat a khung. India tan vawi 32 a inlana goal 12 khung thei striker hian Delhi-ah FIFA World Cup qualifier puala India team training a zawm leh tawh. India hian March 24 khian Tehran-ah Iran an hmachhawn ang a, March 29 khian Kochi-ah Turkmenistan an mikhual leh ang.

Hliam dam hnu

India tana a inlan hmasak match thuma goal li khung thei striker zinkawng hi a mam vek bik lo. Kum 2013-a Goan club hlun Dempo-a zawm hnuah India striker beiseiawm ber pawl nia an sawi
ṭhin hi hliamin a tibuai zeuh zeuh a, ngai a awh leh lawk lo.

Mahse, kum 2014-a Indian Super League club Chennaiyin FC a zawm hnuah Jeje-a hma­sawnna hmuh theihin a awm a, kum 2015-ah Mohun Bagan a zawm. Kolkata club liana a season hmasa berah Jeje-a'n I League nomawi chawi mah se a hun tam zawk bench-ah a hmang.

Kum 2015 Indian Super League a her chhuah meuh erawh chuan Jeje-a'n ngai a awh leh ṭan tawh tih khelmual chhungah a lantir a, ISL-ah Chennai club hi champion puiin match 11-a inlanah goal ruk a khung a, 'Emerging player of the league'-ah thlan a ni bawk.

2015 hi Jeje-a tan kum ṭha bik a ni. I League nomawi a chawi bakah ISL nomawi a chawi a, SAFF Cup-ah India a champion pui a, India tan vawi 10 a inlanah goal thum a khung.

Season hmang ṭha Jeje-a'n rimtu a ngah a, East Bengal leh Mohun Bagan-te'n Hnahthial tlangval neitu nih an inchuh. Jeje-a'n a club hlui Mohun Bagan bawk a zawm leh a, Kolkata club tan contract a ziah lawk loh avangin I League match hmasa lamah erawh a inlan lo.

Kum 2015-a hlawhtlinna tam tak a chhar ten Jeje an kiansan lo a, season ṭha tak hmang mekin Indian football ziaktute titi tui ber chu Mizo tlangval Jeje-a chanchin a ni.

Thawhrim rah

Season hmang ṭha tak Jeje Lalpekhlua chuan tun hnaia a hlawhtlinna chu Pathian venna leh a thawhrim rah liau liau a nih thu a sawi.

Kum 2013-a AIFF Emerging Pla­yer of the Year chuan, "Ka hliam vangin hun engemaw chen ka buai a, ngai ka awh hleithei lo. Mahse, Pathian vennain ka dam chho a, tuna ka hlawhtlinna hi chu ka thawhrim rah liau liau a ni," tiin hlawhtlinna chang tura a thawhrim thu Vanglaini Palai hnenah a hrilh.

Chennaiyin FC-a Jeje-a nena kheldun ṭhin Brazilian midfielder Bruno Pelissari chuan Jeje-a hi ISL-a Indian player ṭha ber a nih thu a lo sawi tawh a, Brazil Serie A club khawiah pawh khel tura a ṭhat tawk thu a sawi - Mizo tlangvalin India football a run mek e.