T20 World Cup Pakistan an par vûl; England ngam loh Gayle

Nilaini zan khan Twenty20 World Cup match hnih khelh a ni. Inkhel hmasa zawkah Pakistan-in Bangladesh an sawp a, inkhel hnuhnung zawkah West Indies chuan Chris Gayle-a century hmangin England an hneh bawk.

Khel ṭha Pakistan

Eden Gardens, Kolkata-a inkhelah Pakistan an bat hmasa zawk a, Pakistan batsman-te'n group stage aṭanga Super 10 inhlangkai Bangladesh bowler-te an ngam hle. Pakistan hian over 20-ah run 201 siaminin mi panga chiah an hloh.

Pakistan tan Ahmed Shehzad chuan ball 39 a hmachhawnah run 52 a vaw chhuak a, Mohammad Hafeez chuan ball 42 a hmachhawnah run 64 a hlap chhuak bawk.

Bangladesh-in over 20 chhungin run 146 bak an tlin lo a, mi paruk an hloh. Bangladeshi batsman zingah Shakib Al Hasan-a'n run 50 siam mah se a
ṭhianten an thlawp ṭhat tawk loh avangin Bangladesh an tlawm.

Pakistan lawmna

The Shaheens (Pakistan cricket team sawina) tana lawmna ber tur erawh captain Shahid Afridi che ṭha hi a ni. Pakistanis all-rounder hian World Cup hmaa T20 match a khelh hnuhnung parukah run 17 chiah siamin wicket thum a la a, T20 khel chi a nih loh thu hmangin sawiseltu an tam hle.

Mahse, kum 37-a upa all-rounder hian amah sawiseltute khelmual chhung-ah a chhanglet a, ball 19 lek a hmachhawnah run 49 a vaw chhuak. Bowling lamah pawh Afridi a che chhe lo. Over li a vawmah run 27 chiah pein wicket hnih a la thei a ni.

Gayle-a 'show'

Wankhede Stadium, Mumbai-a inkhelah Chris Gayle-a che vel chu inkhel entute mit ti tlaitu a ni a, West Indies bats-man hian ball 48 lek a hmachhawnah run 100 a vaw chhuak a, a tawp thleng a dam.

Bat hmasa zawk England-in over 20-ah run 182 siamin mi paruk an hloh a, an khel chhe hran lo. English batsman zingah run 48 siamtu Joe Root leh run 30 siamtu Jos Buttler-te an khel chhe hran lo a, captain Eoin Morgan chuan run 27 siamin a tawp thleng a dam bawk.

West Indies bat hun a thleng a, opening batsman Johnson Charles chu run siam loin a out. Mahse, Chris Gayle lan hnuah erawh England bowler-te an hawihai nasa hle. Kum 36-a upa batsman hian century siam tur hian six vawi 11 a vaw chhuak a, four run vawi nga a siam bawk.

The Windies (West Indies cricket team sawina) hian over 18.1-ah an target um phain run 183 an siam a, mi pali chiah hlohin an chak chiang hle.

Man of the match Chris Gayle chuan, "Innings ropui tak a ni a, a tawp thleng out loa khati zat run ka siam thei kha ka lawm hle. Kan bowler Sulieman Benn khan kan bat dawn khan 'va chhuak la, hmuhnawm takin khel rawh' min ti a, kha khan min ti phur em em a ni," tiin a khelh dan chungchang a sawi.

Hmabak

Vawiinah match hnih en tur a awm leh dawn a, inkhel hmasa zawkah tlai dar 3:00 hian Australia leh New Zealand an inhmachhawn ang. Zan dar 7:30-ah chak lo hlim England an inlan lehnghal dawng bawk a, South Africa nen an inhmachhawn ang.

Nizan khan Sri Lanka leh Afghanistan an inkhel bawk a, he chanchin buatsaih a nih lai hian result kan hre hman lo.