MCL hmahruaitu Chhinga Veng

Mapuia Cricket League (MCL) 4th Edition nimina inkhelah Chhinga Veng CC-in Chanma-rians an hneh a, vawi thum khelha la chak vek Chaltlang SC leh Armed Veng CC te inkhelh hun sawn hlat a nih avangin Chhinga Veng CC hi league hmahruaitu a ni.

Suaka Memorial Cri-cket Stadium, Sihhmuia inkhelah hian toss-a vannei Chanmarians chuan over 20 an bat chhungin run 119 siamin wicket ruk an hloh. Chhinga Veng tan Abhay Joshi leh state pawn aṭanga an player chah luh Saidul Alam Faruk-te an rawn ding a, anni hi a tawp thlenga bat tlangin over 13.2-ah awlsam takin an target run 120 an thleng der. Saidul-a hian ball 41 a hmachhawnah run 82 lai a vaw chhuak a, a lo dinpui tlattu Abhay hian ball 33-ah run 33 a vaw chhuak thung.

Inkhel hmasa zawkah Zarkawt Lords CC chuan an khingpui Kulikawn CC chu run 60-in an hneh a, he inkhel result hian an net run rate pawh a vawrh sang hle.

Vawiin aṭang hian fifth round match khelh leh nghal a ni dawn a, vawiinah match khat chiah awmin Armed Veng Cricket Club leh Kulikawn Cricket Club-te an inhmachhawn ang. Armed Veng tan top four-a luhna chance duhawm tak a la awm a, hetihlai hian vawi li-a vawi li chak tawh lo Kulikawn tan beisei tur a tam tawh lo.