FIFA-in inchingfel turin hma la mek

Football khawvela thuneitu sang ber FIFA chuan thuchhuah siam-in tun hnaia FIFA official ṭhenkhat eirukna avanga sum tam tak chingpen chu nei let leh tura theihtawp an chhuah tur thu an sawi a, FIFA executive committee member eirute chuan dollar maktaduai tam tak an ti chingpen niin an sawi.

FIFA hruaitu hlui 41 lai chu USA lamah eiruk thubuai siamsak an ni a, heng official hluite hian thamna leh eirukna chi hrang hrang hmangin FIFA sum an ti chingpen tih FIFA chuan a puang a ni.

February-a FIFA president thar atana thlan Gianni Infantino chuan, "FIFA hruaitu tam takin mipui min rinna an ti bawrhbang a, FIFA zahawmna leh football chhungkaw ropuina an ti hmelhem a ni. Sum tam tak an eirukte kha football sum a ni a, football hmasawnna tura ruahmante a ni. Khawvel huap football hotu a nihna angin FIFA chuan heng sumte hi neihlet leh tumin theihtawp a chhuah dawn a, engtia rei nge beih ngai ang tih kan ngaihtuah lo," tiin theihtawp an chhuah tur thu a sawi.