Eng team pawh hmachhawn kan hlau lo - Enrique
Nilaini zan khan Champions Legue last 16 chu khelh zawh a ni a, Atletico Madrid, Bayern Munich, Barcelona, Benfica, Manchester City, Paris Saint-Germain, Real Madrid leh Wolfsburg ten an khingpui ṭheuh hnehin quarterfinal an lut. Nizan khan Europa Legue quarterfinal khelh zawh ni bawkin inkhel result erawh kan hre hman lo thung.
Vawiin tlai dar 5:30 hian Nyon, Switzerland-ah Champions League quarterfinal draw neih a ni dawn a, dar 4:30-ah Europa draw neih hmasak a ni thung dawn. Barcelona manager Luis Enrique chuan eng team pawh hmachhawn tura an inpeih thu a sawi a, Manchester City striker Sergio Aguero erawhin Barca emaw Bayern Munich emaw hmachhawn loh hram a duh thu a sawi ve thung.
Quarterfinal draw hi open a neih tur a nih avangin ram pakhata club pahnih awm pawh an inhmachhawn thei dawn. Champions Legue quarterfinal lut zingah Spanish La Liga chuan club pathum Barcelona, Real Madrid leh Atletico Madrid neiin a thawh hnem ber an ni a, German Bundesliga chuan Bayern leh Wolfsburg neiin a dang pathum chu league hran hran aṭangin a ni thung.
Spanish manager Enrique chuan, "Lionel Messi, Luis Suarez leh Neymar kan nei hi kan vannei a, anni neih hi chu a thlamuan thlak. Mahse a pawimawh ber zawk chu kan thawhhona ṭha leh inlungrualna hi a ni. Eng team pawh hmachhawn turin kan inpeih," tiin a sawi.
Bayern Munich manager Pep Guardiola a lawmpui thu sawi zuiin Enrique chuan, "Pep hi ka lawmpui a, an result vang chauh pawh ni loin an beidawn duh lohna kha a ropui ka ti," tiin a sawi. German champion Bayern hian an mikhual Juventus chu extra time khelh a nih hnuah 6-4 in an hneh a ni.
A vawi khat nana Champions Legue quarterfinal lut Manchester City striker Aguero chuan, "A sang thei ang ber thlen kan duh a, chumi tur chuan team ṭha ber ber kan hneh a ṭul thung. Tun dinhmunah chuan Barca leh Bayern te hi an khel ṭha tluang takzet a, anni pahnih hi chu hmachhawn an chakawm hran lo. Kan thlen ngai loh kan thleng thei hi kan lawm a, beidawng loin kan beih chhunzawm zel ang," tiin quarterfinal lut zingah hmachhawn chak loh bik a neih thu a zep lo.