Bayern leh Juve danglamna Pep

German club ropui ber Bayern Munich-in an manager Pep Guardiola cham zel turin an chelh bet zo lo a, Manchester City-in Manuel Pellegrini contract pawtsei loin Spanish manager hi season thar atan sum tam tak sengin contract an ziah pui bawk. Barcelona ropuina belhchhahtu Pep hian Bayern thlak danglam nan 'Tiki Taka' a her hret a, Spanish manager hi a special a ni.

Nilaini zan inkhelah Paul Pogba leh Juan Cuadrado hmang-in Juventus-in goal hnihin hma hruai zet mah se Bayern Munich-in Robert Lewandowski leh injury time-a Thomas Muller-a goal hmangin an chhang let. Italian champion leh German champion hi 2-2 a vawi hnih an inhnehtawk avangin extra time khelh a ni a, Thiago Alcantara leh Kingsley Coman goal hmangin Bayern Munich 4-2 in an chak. Inkhel pahnih belhkhawma Pep Guardiola hote chakna zat hi 6-4 a ni.

Juve fuh teuh

Juventus-in Serie A-ah match 19 chhungin vawi khat an inhnehtawk a, thla hnih tling ṭep goal chhuah loin league hmahruaitu an ni. Max Allegri hote hian inrintawkna nen Germany panin bul pawh an ṭan fuh hle.

French midfielder Pogba-a'n minute 5-na lekah Bayern keeper Manuel Neuer leh defender-te chesual zarah goal a khung a, thlirna dang aṭang chuan Juventus hian pressure an pek ṭhat avangin Bayern player-te'n an tisualah a ngaih theih.

Italian club tan Alvaro Mo-ra-ta a khel ṭha a, goal hnihna an khung theih nan defender engemaw zat a bum hnuah Juan Cuadrado a pe a, inrintawkna nen Chelsea player hlui hian minute 28-naah goal hnihna a khung.

Real Madrid forward hlui Morata hian goal hnihna a khung a, offside vangin pawm a ni lo a, replay aṭang chuan goal-a pawm tur a ni thung. Italian club hi Bayern talbuai lai hian chak thei mai tur an ni a, amaherawhchu an finishing
ṭhat tawk loh vangin hmun him zawkah an inhlangkai thei lo.

Pep nge nge

Second half-ah Pep Guar-diola-a'n thusawi chiah duh tawk loin defence laia ding khel ṭha lo Medhi Benatia aiah Juan Bernat a luhtir a, minute 60-naah Juventus aṭanga an hawh Kingsley Coman a luhtir bawk.

Minute 73-naah dinglam aṭanga Douglas Costa cross chu Robert Lewandowski-a'n tauh lutin Bayern tan beiseina a siam a, injury time-ah Juventus player talbuai zarah Arturo Vidal-a'n ball changin Italian club tana a khelh pui ṭhin Coman a pe a, French winger cross hi Muller-a'n a tauh goal.

Bayern an vannei a, Pep-a danglamna a lang bawk. Spa-nish manager hian rang tak takin a naute lei hrulah ball a inpek kualtir ringawt lo a, awmze neiin ball an vawrh tel bawk. Extra time-ah Thiago Alcántara rawn lutin minute 108-naah Muller-a siam chu Spanish midfielder hian goal-ah a chantir a, Barca duo Luis Suarez leh Lionel Messi te goal khung ni awm tak a ni.

Minute 110-ah kum 19 leka upa Coman-a'n field chanve chuang zet a khalh hnuah chiang zetin Gianluigi Buffon dan rual lohin cool takin a pet goal. Pep hian French rawlthar hi Bayern-ah player ṭha zawkah a chher a, chu chuan Spanish coach ropuina a belhchhah.

Eng nge an sawi?

Bayern boss Pep Guardiola chuan, "Italian team laka goal li khung hi a ropui a, goal hnih chhuah hnua goal khung kan nih avangin a ropui lehzual. Season liam ta finalist kan khel a, ka player-te khelh ṭhat zarah kan chak hram a ni," tiin a sawi.

Juve coach Massimiliano Allegri chuan, "Player ṭha bik nei team lakah ṭha takin kan khel a, kan chak loh danah zahna tur a awm lo. A pawi lai ber chu 3-0 ni thei mai tur a nih laia goal kan khung lo kha a ni. A tawp lamah khan fimkhur deuh ilang chuan kan him tur a ni a, chutihrualin ka player-te ka dem lo, an khelh danah ka chhuang takzet," tiin a player-te a sawisel duh lo.