Dortmund-ah Sancho a hlim?

Manchester United nen sawizawm a nih avanga thawm nei ring tak Jadon Sancho chuan Nilaini khan a club khelh mekna Borussia Dortmund tan pre-season match a khel a, an club rawlthar rual te nena khelhho chu nuam a tih thu a sawi. 

Dortmund hian pre-season-ah hian Austrian club SCR Altach chu 6-0 in an hneh a, first half minute 45 chhung chu English forward hi a khel. Sancho chuan, "Kan squad player naupang te nena khelhho hi nuam ka ti hle. 

"Rawlthar duhawm tak tak an ni hlawm a, an hmabak pawh a êng a ni. Anni nena khelmual khata inkhelh ho a, kaihruai theitu ka ni hi ka lawm takzet. Kum 17 ka nihin Dortmund ka zawm a, vawiina ka inkhelhpuite kum ang zat tho ka ni. An tawn ang hi ka tawng vek tawh a, thil ṭha leh ṭha lo thliar thiam turin ka kaihruai thei a, phurna pawh ka pek theih ka beisei," a ti a, he inkhelah hian rawlthar duhawm, kum 17 mi ve ve Jude Bellingham leh Gio Reyna te pawh an inlan. 

Sancho hi Dortmund chuan pound maktaduai 100 an chhiar a, August 10 kha United-in an lei duh a nih chuan inchinfelna tur hun atana an tih a ni bawk. Mahse, United chuan Covid-19 vangin Dortmund chhiarna ang zata Sancho lei hi an zuam lo.