Italian Open khelh hun atan Sep 14

Tennis clay court inelna Italian Open chu September 14-21 chhungin Rome khawpuiah khelh a ni dawn a, season dang ang bawkin inelna lian French Open inbuatsaih nana hman a ni ang.

A tira ruahman dan chuan Italian Open hi May 11-a khelh tur kha a ni. Covid-19 vangin September thla chawhnu lam atan sawn an ni a, an sawn hun aia kar khata hmaah an pawh hnaih leh thu hi an sawi.

Italian Tennis Federa-tion chuan, "Qualifying chu September 12 aṭangin khelh a ni dawn a, inelna tak chu September 14-21 chhunga khelh a ni ang. Player inlan tur tan a awlsam zawk theih nan a hun tih tawi leh sawn hma a ni," tiin thuchhuah an siam.

Clay court inelna lian ber French Open pawh May thlaa khelh tur kha ni mah se a hun sawn a ni a, Paris khawpuiah September 27 aṭangin an khel ang - Grand Slam tournament-ah hian a hmuna entu an awm theih an beisei.