Liverpool an vul, Manchester derby a hlu
Manchester United manager Louis van Gaal-a'n duh thlang thei se Liverpool hneh lo a tlak ai chuan Champions League-a palina nih a Europa League khelh loh a duh hial ang. Tunah erawh duh thlan nan hun a tlai tawh, Europe-a an vawi khat intawnnaah Liverpool-in an hmelma Manchester United chu Europa League aṭangin an pet chhuak.
Liverpool-in Anfield-ah Red Devils 2-0 a an hneh hnuin Ningani zan khan Old Trafford-ah 1-1 in an inhnehtawk a, 3-1 a hote chakpuitu Jurgen Klopp chu Kop zingah a tla tlum sawt ang.
UCL khelh tum
Europa League champion-in Champions League an khel thei a, a sang pariat zingah Liverpool an tel. Europe inelna sang ber hmunruak pakhat hi Reds tan chan theih a ni.
Amaherawhchu German manager Klopp-a hote tan Europa League ringawta innghah a finthlak lo, Europe-a United an hneh theih chuan Premier League-ah pawh an tluk thei ngei ang.
Reds hian palinaa awm mek Manchester City point sarihin an pha lo a, match khatin an khel tlem zawk. Liverpool hi Pathianni zan dar 7:00-ah Southampton nen St Mary's Stadium-ah an inkhel dawn a, point 44 hmu ve ve inkhel a chak lo zawk tan league hmanga European competition khelh phak a har ṭalh ang.
Pathianni zan vek hian Manchester Derby a awm bawk dawn a, Reds hneh loh vanga ngui United-in an ṭhenawm City an hneh chuan an inthlauhna hi point khat chauh a ni tawh ang. Etihad Stadium-a inkhel turte hi Liverpool hneh hnu ve ve an ni a, chutihrualin Derby match a nih vangte leh season thara Champions League khelh pha tur zawnna a nih avangin a pawimawh hle.
Old Trafford-ah chuan
Allianz Arena-ah Bayern Munich-in ropui takin Juventus an lehthal a, United tan zir tur ṭha tak an hnutchhiah.
Manchester United-in bul an ṭan danah beisei an nei tih a chiang a, Anthony Martial-a'n minute 32-naah Nathaniel Clyne lakah penalty hlawh chhuakin a pet goal nghal.
United hian ball chang tam mah se goal hmaah erawh Liverpool an hlauhawm zawk a, Philippe Coutinho-a'n first half tawp hmain a khalh tlang a, a pet goal bawk. Brazilian playmaker goal mawi vangin United-in chak turin goal thum dang khung a ngai a, Louis van Gaal-a hote beiseina a tawp chiang hle.
Liverpool hi khualmualah chak thei an ni a, ṭum dang ang bawkin Spanish keeper David de Gea a khelh ṭhat avangin match zawnin an chak thei lo.
Engtin zel?
Inkhelh banah Liverpool ṭantuten United fan tih el pahin buaina an siam a, BBC Radio 5 live commentator Ian Dennis chuan UEFA-in hremna an lekkawh ngei tur thu a sawi.
Amaherawhchu United fan pawh hian first leg-ah Hillsborough chhiatna hawi zawngin Liverpool supporter-te an au el a, UEFA in an hrem lo.
Liverpool manager Jurgen Klopp chuan, "Phil tan hun duhawm a ni a, halftime hmaa a khingpuite aia a thiam zawkna a lantir vel kha chu hmuh nuam tak a ni. A thiamna enin thilmak a ni hran lo," tiin goal khungtu a fak a, United penalty hmuh danah sawisel tur a awm loh thu a sawi tel bawk.
Manchester United boss Louis van Gaal chuan, "Ka thinrim lo a, ka beidawng lo. Theihtawp kan chhuah a, supporter-te pawhin an hmuh hmaih lo. Kan chak lohna tuartu tur chu Manchester City an ni a, Champions League qualify turin kan hneh a ṭul a ni," tiin derby-a chak ngei an tum thu a sawi.
Tun dinhmunah United-in City an tluk lo a, season tharah Pep Guardiola-a'n City hi a zawm dawn bawk avangin Red Devils hmalam hi a ngaihtuahawm hle. Louis van Gaal-a hoten City
ṭhang chak lutuk tur an dan theih dan chu season thara Champions League khelhtir loh a ni a, chumi tur chuan Pathianni zana hneh ngei a pawimawh ang.
Zanin Inkhel Tur
Everton 6:15 PM Arsenal
Crystal Palace 8:30 PM Leicester City
West Brom 8:30 PM Norwich City
Watford 8:30 PM Stoke City
Chelsea 8:30 PM West Ham United
Swansea City 11:00 PM Aston Villa
March 20, Pathianni
Southampton 7:00 PM Liverpool
Newcastle United 7:00 PM Sunderland
Tottenham Hotspur 9:30 PM AFC Bournemouth
Manchester City 9:30 PM Manchester United