Champion lai Sri Lanka chak nghal

Twenty20 World Cup champion lai Sri Lanka chuan an match hmasa berah hnehna an chang nghal a, group stage aṭanga super 10 inhlangkai Afghanistan chu wicket rukin an hneh.

Eden Gardens, Kolkata-a inkhel-ah Sri Lanka an khel chhe hran lo a, over 20 chhunga run 153 siamin mi pasarih an hloh. Afgha-nistan tan captain Asghar Stanikzai a khel ṭha a, ball 47 a hmachhawnah run 62 a hlap chhuak thei.

Afghan batsman zingah ball 14 a hmachhawna run 31 siamtu Samiullah Shenwari a khel chhe hran lo bawk. Group stage-a match thum an hmachhawna chak kim vek Afghanistan hian kum 2010-ah Twenty20 international hi ICC member an khelhpui ve ṭan chauh a, champion lai Sri Lanka laka tlawm hi an tan zahthlak a ni lo.

Sri Lanka hian over 18.5-ah run 155 vaw chhuakin an target an um pha der a, mi pali chiah an hloh. Sri Lanka batsman zingah Tillakaratne Dilshan a khel ṭha fal a, kum 39-a upa batsman hian a la upa lo tih khelmual chhungah pholangin ball 56 a hmachhawnah run 83 a hlap chhuak a, a tawp thlenga damin a team hi hnehna a chanpui a ni.

Hmabak

Pakistan captain hlui Inzamam-ul-Haq enkawlna hnuaia khel Afghanistan hian Pathianni tlai dar 3:00-ah South Africa an hmachhawn ang a, zan dar 7:30-ah Sri Lanka hian anmahni ang thoa chak chunga inelna bul ṭantu West Indies an hmachhawn ve leh bawk ang.

Nizan khan Australia leh New Zealand inhmachhawnin South Africa leh England an intum bawk a, he chanchin buatsaih a nih lai an result kan hre hman lo.