Arsenal-ah Willian a lut

15th August, 2020

Brazil midfielder Willian chuan season thum chhung atan Arsenal a zawm fel. Chelsea tana season sarih hmang zotu hian a club tana contract thar ziah chhunzawm aiin North London club pan a thlang.

Kum 32 mi Willian hian Blues tan a contract neih lai a hmang zo a, manager Frank Lampard-a'n season hnih atan inremna neih pui leh a duh. Mahse a hun hnunhnung lam hmang tawhtu Willian-a'n contract rei zawk ziah theihna a pan.

Arsenal manager Mikel Arteta chuan, "Kan tana danglamna siam theitu a nih ngei ka ring. Midfield leh tlarhma sir lamah inthuam chak kan duh a, ani hi kan mamawh chhanna chu a ni ang," tiin Premier League tawnhriat ngah winger lakah beisei a nei sang. Bukayo Saka leh Reiss Nelson te kaihhruai turin a duh bawk.

Kum 2013 khan Willian hian Russian club Anzhi Makhachkala aṭangin Chelsea hi pound maktaduai 30-in a pan. London club tan hian a season hmasa berah league match 25 a khel a, a hnu lamah chuan match 30 chuang khel tling vekin player pawimawh a ni.

Blues tan inelna hrang hrangah match 339 khel hmanin nomawi panga a chawipui - a nomawi chawi zingah Premier League pahnih leh Europa League pawh a tel, tun season tawp lam erawh hliam vangin a inlan thei lo thung. Brazil international Willian chuan, "Arsenal khelh dan hmang hi ka duh dan a ni, stadium leh engkim mai hi a fuh vel vek. Arteta kaihhruaina hnuaiah Premier League champion nih kan tum ngam dawn, chu bakah Europe-ah kan khel dawn bawk.

"Arteta nen kan inbia a, inrintawkna min pek bakah an hnena ka kal duh chhan tur ṭha tak tak min hrilh chuan min hneh hle. Khelmual chhunga ṭhiante kianga inkhelh hlan ka nghakhlel tawh hle," a ti.

Season liam ta khan Gunners hi Premier League-ah pariatna an ni a, an dinhmun a ṭha lo. Mahse FA Cup-ah Chelsea hneha an champion avangin season tharah Europa League an khel dawn, player a nih laia an captain hlui Arteta kaihhruaina hnuaiah beiseina an nei mek.

Arsenal hian nipui bazarah player lakluh nan sum an ngah vak lo, man nei loa Willian lak theih hi an tan chanchin ṭha a ni. Captain Pierre-Emerick Aubameyang chuan contract a pawtsei hnai nia sawi a ni bawk.