Zarkawt aiawhtu Serpents

Zarkawt Derby-ah Serpents-in BCA 76-65 a hnehin Mizoram Super League-a Zarkawt Veng aiawhtu an ni. Serpents hian nimin tlai inkhela hnehna an chan avangin semifinal ticket an nei a, BCA erawh MSL khel zel turin relegation playoff-ah Chaltlang Ryders an hneh a ṭul ang.

Lalrina Show

Ningani zan inkhelah Mission Veng Vikings-in Chaltlang Ryders 83-79 in an hneh a, Vikings tan Lalrina Renthlei a khelṭha lehpek hle. Tuikhuahtlang tlangval hian point 32 neiin a team-te a chak pui a, Gujarat center Dishant V Shah tel loh Vikings in an tuar lo. Chaltlang Ryders erawhin MSL2 league stage-ah hneh an nei lo.

Serpents hun

MSL1-ah Serpents-in BCA vawi hnih an hneh lo a, MSL2-ah erawh hnehna an chang. Serpents chak nan Delhi lam aṭanga an chah chhuah an coach Arvinder Singh a pawimawh tih a chiang a, Guwahati center Sahil Sharma a ṭangkai leh bawk.

Coach Arvinder-a hnuaia an match hmasa berah Serpents-in TBL hneh lo mah se Tuikual South leh BCA hnehin semifinal an lut. Tunah chuan Zarkawt mipui tan MSL-ah ṭan tur a chiang tawh a, an ṭan tur chu Serpents a ni.

A hmawr bawkna

Nizan lama inkhel Khatla TBL leh Tuikual South inkhel result kan hre hman lo. Tuikual South hian hnehna an chang a nih chuan Vikings nen an point hmuh zat a inang ang a, head to head-a an ṭhat zawk avangin palina Serpents an hmachhawn ang.

Khatla TBL an chak erawh chuan Vikings nen an point hmuh zat inang mah se head to head-a an tluk loh avangin TBL hi pahnihna an ni ang a, Tuikual South-in Serpents an hneh loh avangin Mission Veng leh Tuikual South an inkhel ang a, Khatla TBL leh Serpents an inhmachhawn thung dawn a ni.

BCA-in Thawhṭanni zan dar 8:00-ah Ryders nen Relegation Playoff game hmasa ber an khel dawn. Playoff hi game thum khelh tur niin a chak lo zawk Division I-ah an relegate ang a, a chak zawk hian Division I pahnihna VR4 nen MSL3 khelh tumin game thum bawk an khel leh ang.