Leicester-a chawlh duh Ranieri

Premier League hmahruaitu Leicester City manager Claudio Ranieri chuan King Power Stadium-ah a hun tawp hman a duh thu a sawi a, tun hnaia Italy nena sawizawm an nihna chu pawm tumna a neih loh thu a sawi.

Kum 64-a upa manager hian Leicester-a a season hmasa berah Foxes hi mumang ramah a chenpui mek a, relegation battle nei tura ngaih team hi Premier League-ah point ngain hma a hruai fal pui mek.

Tun hnaiah Italy manager Antonio Conte chuan Euro 2016 tawp rualin a hna chelhlai a chawlhsan tur thu a puang a, Chelsea nen sawizawm an ni. Hetiang boruak hnuaiah hian Conte thlak turin Ranieri hming a ri ring hle.

Mahse, Foxes manager chuan, "Leicester-a awm zel hi ka duh a, ka ngaihtuahnaah team dang an lang lo. Eng thil mahin ka ngaihdan hi a sawhsawn thei lo ang, he hmunah hian ka hlim em em a ni," tiin English club chhuahsan tumna a neih loh thu a sawi.

French club Monaco a enkawl laia Ligue 2 aṭanga Ligue 1 a kaipui kuma pahnihna nihpui nghal thei manager hi Leicester-a a hnathawh ṭhat avanga rimtu an tam a nih pawhin thil mak a ni hran lo.

Mahse, July thlaa kum thum chhung cham tura Leicester City manager chuan Foxes-ah bul a ṭan chauh thu sawiin, "Tunah hian ka team duh ang chu kan din chho ṭan mek chauh a ni a, he club neitute hi ka chungah an lawm a nih phawt chuan kei chuan vuina tur ka nei lo," a ti.

Leicester City hian zanin dar 8:30-ah Crystal Palace chu league match khel turin khualmualah an lenchilh ang.