Ibra lak tum lo Arsenal

19th March, 2016

Arsenal-in goal khung thei striker an nei lo a, season tawpah Ligue 1-a Paris St-Germain champion puitu striker Zlatan Ibrahimovic contract a tawp dawn.

Gunners boss Arsene Wenger chuan, "Kum 34 a nih hnuah pawh Ibrahimovic hian PSG tan season ṭha tak a hmang thei a, amaherawhchu tun dinhmunah chuan player lei lam ka ngaihtuah lo. Ngaihtuah dang ka nei," tiin season thar aia tun dinhmun a ngaih pawimawh zawk thu a sawi.

Arsenal hian zanin dar 6:15 hian Goodison Park-ah Everton an hmachhawn dawn a, chak tur chuan goal an mamawh. French manager Wenger chuan, "Ka striker-te chungah hian rinna ka nghat a, kan mamawh chu game ṭha taka khelh a ni. Team pum pui kan khelh ṭhat chuan kan striker-te'n hamṭhatna an hmu ang. Barcelona kan khelh ṭum anga kan khelh nawn chuan goal an khung em em ang," tiin a striker-te a rintawk thu a sawi.

Gunners hian inelna hrang hranga an match hnuhnung pariatah vawi khat chiah chak result an nei thei a, chu pawh FA Cup replay-a Hull City an hneh kha a ni. London club hian match 29 khelh tawh aṭanga point 52 hmuin league table-ah pathumna an ni mek a, anmahni aia match khata khel tam zawk chunga hmahruaitu Leicester City chu point 11 zetin an pha tawh lo.

March thla a nih tawh avangin Arsenal chet chhiat hun a thleng a, Pathianni liam ta khan Watford-in FA Cup aṭangin an pet chhuak a, Nilaini zanah Barcelona-in Champions League aṭangin rin lawk ang ngeiin an ti tla bawk.

Wenger-a sawi dan hmangin Jack Wilshere leh Santi Cazorla te an la dam lawk dawn lo a, anni bakah hian Aaron Ramsey,Petr Cech leh Alex Oxlade-Chamberlain te an la chhawr thei dawn lo. Barcelona khelh ṭuma awltir Olivier Giroud leh Theo Walcott te'n inkhel bul an ṭan beisei a ni.

Arsenal boss Wenger hian Premier League chu season ngaihnawm chhunzawm zel tur thu a sawi a, an chung lama awm an umphak theih ang bawkin hnuai lama awmten an la lehpelh theih thu a sawi.

Gunners khingpui tur Everton hian league-ah West Brom leh West Ham te Goodison Park-ah hneh lo zawn mah sean match hnuhnung berah Chelsea hnehin FA Cup semifinal an thleng a, an phur vanglai tak ni. Amaherawhchu midfielder pawimawh Gareth Barry-a'n Chelsea nena red card a hmuh avangin Arsenal a hmachhawn thei dawn lo.