Khawvel ngaihven India vs Pakistan

Twenty20 World Cup-a cricket ngainatute hmuh chak ber zawt ila - India leh Pakistan inhmachhawn hi a ni ngei ang. Zanin dar 7:30-ah ram inhal pahnih hi an inhmachhawn dawn a, inkhel hi Star Sports 1-ah a en theih ang.

Eden Gardens, Kolkata-a inkhel tur hi India tan a pawimawh lehzual ang. Champion tura beisei kai ber inelna thlengtu hian an match hmasa berah rin loh takin New Zealand an hneh lo a, Pakistan hian Bangladesh an hneh tawh thung.

Team pahnih intawn hnu-hnung ber chu February 27 khan a ni a, Bangladesh-a Asia Cup match-ah India hian wicket ngaa hnehna changin Pakistan hi run 83 an siam hman awrh tiha an vawm out vek avangin zaninah pawh an zuam sawt ang.

Boruak chu

India leh Pakistan inhma-chhawn tur hi a tirah chuan Himachal Pradesh-a Dharamsala khawpuia inkhel tura tih an ni a, mahse ex-servicemen-te'n hei hi duh lohna an lantir avangin HP sorkar chuan Pakistan hi venhimna ṭha zawk pek theih an inbeisei lo a, Kolkata khawpuia khelh tura sawn a ni.

Pakistan lamin venhimna lama hlauhthawn thil thuah India hi an pan lawk duh lo a, mahse BCCI lamin venhimna ṭha zawk pek an tiam avangin an rawn kal hram.

India ram an rawn thlen tirhin Pakistan captain Shahid Afridi-a'n, "Cricket khawvela ka hun tawp lam ka hmang ṭan der tawh a, India rama mipui min lawmna hi chu Pakistan-ah pawh ka dawn zen zen loh a nih avangin ka hre reng ang," tiin ṭawngkam a nei a, Pakistan-ah chuan an helh hle.

Pakistan captain hi an ram lama ukil pakhat chuan an ram phatsantuah puhin 'legal notice' a pe hial a, the Shaheens (Pakistan cricket team sawina) captain hian an ram lamah sawiselna nasa tak a tawk. Hei ringawt pawh hian India leh Pakistan inkhel tur boruak san zia a hril chiang hle.

Team pahnih

Pakistan hian tournament lianthamah India an la hneh ngai lo. ODI World Cup-a vawi ruk an inhmachhawn tawhah Pakistan hi a tlawm zawkah an la ṭang vek a, T20 World Cup-a vawi li an inhmachhawn tawhah India an la chak vek bawk.

Eden Gardens erawh Pakistan khelmual hmanthiam a ni a, ODI-a vawi li he hmunah an inkhelh tawhah mikhual team hian hnehna an la chang fai vek a, ODI lama an record duhawm hi T20-ah chhawm ngei an duh ang.

Player pawimawh

India tan an innghahna tur chu Virat Kohli a ni lehin a rinawm a, India batting lineup-a player langsar rual karah Delhi tlangval hian Pakistan a ngam fal hle. T20-a Pakistan a hmachhawn apiangin run 66.3 siam ziah ang a ni.

India a fak vanga Pakistan fan-te ngei rawn hlawh mek Afridi-a'n Shaheens fan-te lungawi nan chet ṭhat a tum ngeiin a rinawm a, kum 37-a upa batsman hian Bangladesh an hmachhawn ṭumin ball 19 lek a hmachhawnah run 49 a siam thei a, a la tar lo.