Federer a lo kir hnai

Roger Federer chu karleha khelh tur Miami Open-ah a inlan dawn, Swiss thiampuipa hi beisei aiin a khup na a dam chak a ni.

Kum 34-a upa Federer hian kumina Grand Slam hmasa ber Australian Open semifinal-ah world number 1 Novak Djokovic chu a hneh lo a, hemi ṭum hian a khupah na a nei. February thla khan a khup hi zai niin thla leha khelh tur Monte Carlo-ah lo kir leh tura beisei chauh a nih laiin beisei aia hmain a inkhel leh thei dawn. Miami Open hi March 23 aṭanga April 3 inkar khian khelh tur a ni.

Grand Slam vawi 17 champion tawh Federer hian kum 2005 leh 2006 khan Key Biscayne-ah hian hlawhtlinna a lo chang tawh a, he hmuna a inlan hnuhung ber chu kum 2014 kha niin hemi ṭum hian quarterfinal a thleng.

Kum 2005 khan Federer hi a kephah na vangin kar ruk chhung a lo inkhel thei lo tawh a, kum 2008 khan a hnungzâng na vangin a lo buai tawh bawk. Tun ṭuma a khup na vang hian ABN AMRO World Tennis Tournament, Dubai Duty Free Tennis Championships leh BNP Paribas Open-ah te a inlan thei lo a ni.