Sindhu-in quarterfinal a lut

Swiss Open Grand Prix Gold khelh mekah Indian shuttler PV Sindhu chuan Ningani khan quarterfinal a inhlang kai. Nilaini khan Saina Nehwal leh B Sai Pra-neeth te pawhin last 16 an lo lut ve tawh bawk.

Basel-a inkhelah seeded parukna Sindhu hian Chinese shuttler Yu Po lakah 21-16, 21-16 in hnehna a chang. World number 11 Sindhu hi kar hmasa khan All England Championship first round-ah a tla a, tun ṭumah erawh insiam ṭha tawhin beiseina sang tak a nei mek.

Olympic bronze medallist Saina chuan minute 33 chhungin Karin Schnaase chu 21-7 21-15 in a hneh, Saina hian Swiss Open title hi kum 2011 leh 2012 khan a lo chawi tawh bawk a ni. Nimin khan last 16-ah Kristina Gavnholt a hmachhawn leh a, he thu buatsaih lai hian result kan hre hman lo.

World number 1 pawh lo ni tawh Saina hian Ningani khan kum 26 a tling chiah a, kar hmasa khan All England Championship-ah che fuh loin quarterfinal-ah a tla. Hliam vangin Ja-nuary leh February khan Syed Modi Grand Prix Gold leh South Asian Games-ah a inlan lo bawk, hengte avang hian BWF world ranking chhuak thar berah chuan number 6-ah a tla thla a ni.

Mipa inkhelah Indian shuttler Sai Praneeth-a'n harsatna nei loin last 16 a inhlangkai bawk a, Artyom Savatyugin chu minute 21 chhung lekin 21-7 21-10 in a hneh a ni.