Champion lai inlan dawn lo

US Open hmeichhe singles champion lai Bianca Andreescu chu coronavirus vangin kuminah a inlan thei dawn lo, mipa champion lai Rafael Nadal a inhnuhdawh tawh bawk avangin nomawi kawl mektu pahnih an inlan dawn lo tihna a ni.

Kum 20 mi Andreescu hian nikum khan season duhawm a hmang. Mahse October thla khan a thiam zual pariat inelna WTA Finals an khelh ṭumin a khup a hliam a, a duh aia season a hman zawh hma bakah kumin tir lamah a inkhel thei lo.

Season tir lama a inlan loh hnuah Covid-19 vangin chawlh zui a ngai a, tunah hian dam tawh mah se hripui leng vangin New York khawpuia inkhel tura zin luh a la zuam lo - French Open lamah erawh inlan theih a beiseiawm tawh thung.

Canadian nula Andreescu chuan, "New York khawpuiah inkhel tura ka kal thei dawn lo tih thutlukna siam hi a hrehawm hle, nuam ti tak leh a ṭha thei ang bera khelh leh kha duhthusam ni mah se kuminah erawh a rem ta lo," a ti.

Season hmasa US Open final-ah Andreescu hian champion tura rinkai leh player ṭha zawk nia ngaih Serena Williams hnehin nomawi a chawi a, kuminah erawh a hmel a lan dawn lo - hmeichhe ranking sang zual 20 zinga inhnukdawk palina a ni.

Serena Williams erawh inlan ngei a tum thung a, world number 2 leh seeded pakhatna ni thei tur Simona Halep erawhin a dinhmun tur a la tichiang lo; Romanian nula hian kar leh lamah thutlukna a siam tur thu a lo sawi tawh.