Premier League Young Player of the Season Trent Alexander-Arnold

Liverpool defender ṭhangduang Trent Alexander-Arnold chu season hman zawh taka Premier League rawlthar duhawm berah thlan a ni a, Premier League Young Player of the Season chawimawina a dawng. 

England international hi Manchester United trio Marcus Rashford, Anthony Martial & Mason Greenwood, Chelsea player pahnih Mason Mount & Christian Pulisic, Aston Villa captain Jack Grealish, Sheffield United goalkeeper Dean Henderson-te nen an hming chhawpchhuah a ni a, chawimawina dawngtuah a ṭang ta a ni. 

Arnold hian season hman zawh takah khan Liverpool tan inelna hrang hrangah match 49 khelin goal li a khung a, assist vawi 15 a nei. Assist a neih zinga 13 hi Premier League-a a ṭhiante khung tura a siamsak a ni a, defender-in Premier League season khata assist an ngah ber record a siam - season hmasaa vawi 12 assist neia record a lo siam tawh chu amah vekin a khum leh ta a ni.  

Kum 21 mi defender hi 2018-19 season khan PFA Team of the Year-ah a lo tel tawh a, tun season Premier League-a Liverpool-in champion nomawi an chawi nan player ṭangkai a ni. Hetihlai hian PFA Premier League Fans' Player of the Year chawimawina dawng thei tur hming chhawpchhuah a ni bawk a, Reds player pathum Sadio Mane, Virgil van Dijk leh Trent Alexander-Arnold-te hming a lang.

 

Liverpool player pathum bakah hian Manchester City forward Raheem Sterling, midfielder Kevin De Bruyne leh Leicester City striker Jamie Vardy hming pawh chhawp a ni a, thepfa.com-ah online-in vote thlak theih a ni.