Kohli vangin India-in Pakistan hneh

India-in an match hmasa berah New Zealand hneh lo mah se an match hnihnaah Pakistan chu wicket rukin an hneh a - Twenty20 World Cup champion ni turin India fan-te tan beiseina an siamsak leh ta.

Inkhelh ṭan hma hauhin team pahnih inhmachhawn turin ngaihven a hlawh a, politics khawvela inhal ram pahnih hian an inhuatna khelmual chhungah an sengluh miau avangin a boruak a sang lo thei lo a ni.

Inkhel chu

Eden Gardens, Kolkata-ah ruah a sur avangin over 20 khelh theih a ni lo a, over 18-ah tih tawi a ni. Pakistan-in bat hmasak an thlang a, over 18 chhunga an run siam zat chu 118 niin mi panga an hloh.

The Shaheens batsman zinga run siam hnem ber Shoaib Malik chuan ball 16-a hmachhawnah run 26 a siam a, Bangladesh laka khel ṭha tak captain Shahid Afridi chuan run 8 a tlin hram bawk.

India bat hun a thleng a, an target run 119 siam turin over 15.5 bak an mamawh lo a, mi pali chiah an hloh. India tan hma takah Rohit Sharma, Shikhar Dhawan leh Suresh Raina-te out mah se India-in Pakistan neih loh an nei a, chu chu Virat Kohli a ni.

Delhi tlangval hian ball 37 a hmachhawnah run 55 a siam a, a tawp thleng damin India a chakpui chiang hle. India tan Yuvraj Singh-a'n ram tana khelh a la phu zia lantirin ball 23 a hmachhawnah run 24 a siam bawk a, captain MS Dhoni chuan run 13 vaw chhuakin a tawp thleng a dam bawk.

India leh Pakistan hi ODI World Cup leh T20 World Cup-a vawi sawm an inhmachhawnna a ni ta a, heng an inhmachhawnah te hian India-in hnehna an la chang fai vek a ni.

Sachin-a tan

Eden Gardens-a mipui 6,7000 chuang pungkhawm zingah cricket khawvela ropui ber tih ngam Sachin Tendulkar a tel a, India fachuam Sachin-a hming lam chungin fan-te an au a, hlimna tam tak lo pe tawh
ṭhintu cricketer ropui hi India fan-te an la theihnghilh lo.

Man of the match-a thlan Virat Kohli-a'n half century a siam rualin Sachin a lam a hawi a, zahna lantir nan a kun. Delhi tlangval chuan hetianga a tih chhan hi sawiin, "Sachin-a inkhel en chung hian cricket ka khel ve ṭan a, mipui 6,7000 chuang hmaa ka half century atana ka hlan thei hi ka lawm a ni," tiin Sachin a ngaisang hle.

Eng nge an sawi?

India captain MS Dhoni chuan, "Ruah a sur kan ring lo a, mahse ruahsur khan minti buai deuh a ni. Spinner pakhat chiah an neih avangin kan vannei a ni. Tun aia ṭha zawka khel thei hi kan ni a, hmasawnna tur kan la ngah hle," tiin chawl hahdam thei an la nih loh thu a sawi.

India chakpuitu Virat Kohli chuan, "Vawiin kan inkhel kha chu chona phurawm tak a ni a, cricketer tan chuan khatiang kha a nuam a ni. New Zealand lak-ah ka out hma avangin ka lung-hnur em em a, pitch harsa takah bowler ṭha tak tak ka hma-chhawn a, khati zat run ka siam thei kha a lawmawm a ni," a ti.

Pakistan captain Shahid Afridi chuan, "Hetiang ang pitch harsaa khelh hi ka inbeisei lo. Bowling lamah kan ṭha tawk lo a, kei ngei pawhin ka bowl ṭha tawk lo. Virat Kohli khan a bat ṭha takzet a ni," tiin an khingpui batsman a fak.

Inkhel dang

Zirtawpni tlai khan England chuan chak tura rinkai zawk South Africa an barakhaih a, wicket hnihin an hneh. South Africa-in over 20 chhunga run 229 siamin mi pali chiah an hloh a, chak turin an dinhmun a ṭha takzet. Mahse, England-in over 19.4-ah run 230 siamin mi pahnih chiah an hloh a, inkhel hmuhnawm takah hnehna an chang.

Zirtawpni zan inkhelah New Zealand chuan run riatin Australia an hneh bawk a, vawi hnih inkhel an hmachhawnah vawi hnih an chakna a ni ta. Australia hian over 20-ah run 134 siamin mi pakua an hloh a, Black Caps-in over 20-ah run 142 siama mi pariat hlohin hnehna an chang ta a ni.

Nimin tlai khan South Afri-ca leh Afghanistan inhma-chhawnin inkhel hnuhnung zawkah Sri Lanka leh West Indies an inhmachhawn bawk a, he chanchin buatsaih a nih lai hian an result kan hre hman lo. Vawiinah inkhel pakhat chauh a awm dawn a, zan dar 7:30-ah Australia leh Bangladesh an inkhel ang.