Nadal hnehtu Djokovic

Novak Djokovic chuan Rafael Nadal hnehin BNP Paribas Open final a lut a, nizan zanlai khan Milos Raonic nen inhmachhawn lehin nomawi chawitu zawk kan hre hman lo thung.

Inrinni zan Indian Wells-a inkhelah world number 1 Djokovic hi Nadal lakah a che fuh nghal mai bik lo a, set khatnaah Nadal hian set point a hmu hman. Mahse, darkar khat leh minute 58 chhungin Serbian thiampuipa hi 7-6, 6-2 in a chak a; tun hnai an inhmachhawn hnuhnung vawi 11-ah Djokovic hian vawi 10 zet hnehna a chang thei a ni.

Champion lai Djo-kovic chuan, "Set khatnaa kan danglamna chu point hnih khat lek a ni a, set hnihnaah erawh a tawp lam game thum kha ka khel ṭha hle a ni. Rafa nen inkhelh hi chu infiamnaah chuan chona lian berte zinga mi a ni a, hnehna ka chang thei hi ka lawm hle a ni," tiin a sawi.

June thlaa kum 30 tling tawh tur Nadal chuan, "Tun hnai kan inkelh ho nena khaikhin chuan vawiin kha chuan kan inthlau lo hle chuan ka hria. Khawvela ṭha ber ni mek nen kan inhma-chhawn avangin thil a awlsam lo a, engpawh nise ka tan chuan kar ṭha tak a ni tho mai," a ti.

Semifinal lehlamah Raonic chuan David Gof-fin lakah 6-3, 3-6, 6-3 in hnehna a chang a, a vawi 17 nan ATP final a khel ve dawn. Canadian Raonic hian Goffin lakah hian vawi 10 ngawt ace a siam thei a, semifinal thleng tur hian French Open champion lai Stan Wawrinka a lo hneh tawh bawk.