Arsenal an la ral lo

Arsenal chu Champions League leh FA Cup aṭangin pet chhuahin awm mah se Premier League-a an beiseina mei a la mit vek bik lo. Inrinni zan khan Danny Welbeck leh Alex Iwobi te goal khung hmangin Everton 2-0 in an hneh.

Gunners-in a zawna league match thum chak ni hmel an hmuh loh hnuah hnehna an chang ve leh ta a, point 55 hmuin hmahruaitu Leicester City chu point 11 zetin la phak lo mah se Foxes aiin match khatin an khel tlem zawk.

Inkhel chu

Barceolna hneh lo hlim Arse-nal hian inkhel ṭan aṭanga minute sarihna lekah goal hmahruai a khung. Goal khatna khung turin Arsene Wenger-a nauten ground ball an pet thiam zia an lantir a, player pariat Iwobi, Nacho Monreal, Mohamed Elneny, Francis Coquelin, Gabriel Pau-lista, Mesult Ozil, Hector Bellerin leh Alexis Sanchez ten ball an inpek kual hnuah England striker hian defender Joel Robles tlan pelin a hliam a dam hnua a goal lina a khung.

Iwobi-a'n a Gunners tana inkhel bul a ṭanna hmasa berah a pet goal nghal a, Nigerian winger hian counter attack hmang
ṭangkaiin minute 42-naah goal a khung a, kum 19 leka upa nichung siin a inringtawk hle. Everton lam hian an mikhual hi kawng ting rengah an phak lo a ni ber a, goal zawnah vawi hnih chiah an pet thei a ni.

Eng nge an sawi?

Arsenal manager Arsene Wenger chuan, "Barcelona nena kan inkhelh ṭum pawh khan kan khel chhe lo a, khami ṭum anga khelh ang tho khan kan khel
ṭha. Ka player-te hian nitin in hma-sawn turin an thawkrin tih ka hria a, an rilru puthmang hi a dik a ni," a ti. Gunners hian kar bul an ṭan fuh lo a, FA Cup-ah Watford hneh loin UCL-ah Barca an hneh lo zui bawk a, kartawp erawh chak chungin an khar thei hram.

Everton manager Roberto Martinez chuan, "Team ṭha lo zawk kan nih tih a lang chiang hle. Kan match hnuhnung berah Chelsea 2-0 a kan hnehna nen kha chuan a inthlau tawh hle a, a lungawi thlak loh takzet," tiin a sawi.

Blues tan Fabregas

Champion lai Chelsea-in an mikhual West Ham lakah vawi hnih si an phur a, Cesc Fabregas chuan freekick leh penalty aṭangin an si phurh a sut ve ve. Inrinni zan khan Blues leh Hammers te chu 2-2 in an inhnehtawk.

Stamford Bridge-a inkhelah midfielder Manuel Lanzini chuan minute 17-naah yard 25 aṭangin a pet goal a, Petr Cech nekchhuaktu Thibaut Courtois-a'n tih theih a nei lo.

Spain international Fabregas-a'n an freekick aṭangin si phurh sut mah se substitute Andy Carroll-a'n minute 61-ah Hammers hmahruaina goal a khung leh a, ball fing taka petu chu Dimitri Payet a ni.

Hammers an vanduai zui a, minute 89-naah winger Michail Antonio-a'n Ruben Loftus-Cheek a tih tluk avangin penalty a chawi a, referee thutlukna hi West Ham tan hriatthiam a har khawp ang. Arsenal midfielder hlui Cesc hian goal-ah a chantirin Blues a chhanhim.

Chelsea hian an manager lailawk Guus Hiddink kaih-hruaina hnuaiah league match 10 chhung hneh loh tawng loin an kal tluang ve zel a, point 41 hmuin table-ah 10-na dinhmun an luah mek.

Slaven Bilic a naute erawhin Champions Legue an la beisei ngam ve zel a, Manchester City lehpelh theihna hun ṭha bawhpelh mah se Manchester United chu point thumin an tlan san rih a ni.

Inkhel dang

Swansea chuan Federico Fernandez goal hmangin Aston Villa chu 1-0 in an hneh a, point 11 zetin relegation zone an chhuahsan.

Hetihlai hian chak lo zawk Villa erawh table mawngphah mawitu la nih chhunzawm zelin 17-na Norwich City chu point 12 zetin an phak tawh lo a, an him zawh a rinawm tawh lo.

Norwich hian Robbie Brady goal khung hmangin khualmualah West Brom 1-0 in an lo va hneh ve bawk a ni. Inkhel dangah Stoke City chuan Watford lakah 2-1 in hnena an chang ve bawk.