Atletico barakhaihtu Sporting Gijon

Inrinni zan La Liga inkhelah beisei loh result a thleng a, league table-a pahnihna din-hmun luahtu Atletico Madrid chu Sporting Gijon lakah 2-1 in an tlawm.

Inkhel ṭan aṭanga minute 29-na lekah Atletico-in Antoine Griezmann hmangin goal hmahruai an khung a, awlsam taka chak tur angin an lang hman. French forward Griezmann hian tun season La Liga khelh mekah goal 17 a khung tawh.

Mahse, Atletico-in goal dang an khung leh lawk thei lo a, an tuar. Minute 79-naah beisei loh zawkin goal an khung a, La Liga table hnuai ber dawttu Gijon tan Antonio Sanabria chuan an si phurh sutna goal a khung.

Minute 10 a liam a, goal khungtu chu beisei loh zawk Gijon bawk an ni. Spain under 21 international Carlos Castro chuan mualneitu team tan chakna goal hi a khung a, Atletico tan chhanletna hun a awm tawh lo.

Hun tawp thlengin goal dang a lut tawh lo a, Gijon tan January 31 hnua hnehna an channa hmasa ber niin season thara La Liga khelh chhunzawm an beiseina a la nung ve zel.

Atletico manager Diego Simeone chuan, "Tlai dar 4:00-ah kan inkhel a, a hma deuh a ni. Chhuan lama hman tur erawh a ni lo ang. Chak turin kan theihna zawng zawng kan hmang a, mahse kan thei lo. Ka naute kha sawiselna tur an awm hran lo," a ti.

Spanish club ṭha Atletico hian Thawhlehni zan khan PSV Eindhoven hnehin Champions League quarterfinal an inpet kai a, an elpui Barcelona leh Real Madrid te chuan anni ai hian darkar 24 chhung chawlh na hun an nei rei bik a ni.

Argentine manager Simeone chuan Sporting a lawmpuina thu sawi chhunzawmin, "Sporting kha ka lawmpui a, hnehna chang tur khawpin an khel ṭha a ni. Inkhel bul kan ṭan fuh a, mahse a tawp minute 10 chhung khan kan khingpuite khan ball an in pek kual tam em avangin an inveng seng lo a ni ber mai," tiin a sawi bawk.

Inrinni zan La Liga inkhel dangah Las Palmas chuan William Jose goal khat khung hmangin Real Sociedad 1-0 in an hneh a, relegation zone chu point ngain an kalsan rih. Granada leh Rayo Vallecano te 2-2 in an inhnehtawk bawk.