Shaw tan hmun a awm - Hodgson

England manager Roy Hodg-son chuan hliam vanga thla ruk chhung zet inkhel thei loa chawl mek Luke Shaw tan Euro 2016 khel turin hmun a la awm reng thu a sawi.

Manchester United left back hi September 15-a PSV Eindhoven nen Champions Legue group stage an khelh
ṭumin a ngal ruh a tliak a, hliam a tawrh hma hi chuan Shaw hi England tan regular taka khel tluang lai a ni nghe nghe.

Liverpool manager hlui Hodgson chuan Manchester United chu May 12 hmaa Shaw dinhmun ti chiang thei turin a duh a ni.

Zawhna chhangin Hodgson chuan, "Shaw tan kawng a la inhawng reng, a pawimawh ber chu a fit ṭha em tih chauh a ni. Player ṭha danglam bik a ni a, major tournament khel tur chuan a ṭha tawk tih kan hre tawh," tiin a sawi.

May 12 khian Hodgson chuan European Championships-a England aiawh tur hming a puang chhuak dawn a ni. Kum 20-a upa Shaw awm loh hlan hian Tottenham defender Danny Rose leh Southampton player Ryan Bertrand te chu ram tana khel tura koh ṭhin an ni.

Season tawp hmaa Shaw inkhel en hman a duh thu sawi langin Hodgson chuan, "Shaw hi a fit ṭha hman a nih phawt chuan season tawp hmain Man United hian inkhelhna hun an siam sak turah ka ngai. Mahse club lam hian pre season-ah 100% fit a nih theih nan an chawlhtir rih a nih erawh chuan sawi theih ka nei lo. Mahse, a fit ṭha a nih phawt chuan khelmual chhungah luhtir ngei se ka duh," tiin Louis van Gaal chu England defender tana hun ṭha siamsak tura a duhthu a sawi bawk.