Bayern tan Lewandowski goal khat a tawk

Inrinni zan Bundesliga inkhelah Robert Lewandowski chuan Cologne lakah goal khat a khung a, Bayern Munich chu a zawna league title vawi li la turin an dinhmun a ṭha leh tawh hle.

Cologne-a inkhelah hian inkhel ṭan aṭanga minute 10-na lekah Thiago Alcantara cross lo pet chhuah tumtu Cologne defender Dominique Heintz chet fuh loh nangchingin Lewandowski hian goal awmchhun a khung a ni.

Poland international Lewandowski-a'n tun season hian league-ah goal 25 a khung tawh a, Bundesliga-ah season khat chhunga a goal khung hnem ber ṭum a tawng mek. Inelna hrang hrangah Bayern tan goal 42 a khung tling der tawh a ni.

Pep Guardiola naute hian match 27 an khelh tawh aṭanga point 69 hmuin point riatin hma an hruai fal mek a, mahse pahnihna Borussia Dortmund aiin match khatin an khel tam zawk thung.

Spanish manager Guardiola-a'n Champions League last 16-a Juventus an hneh ṭuma a player pawimawh Philipp Lahm, Thomas Muller, Frank Ribery leh Arturo Vidal te a chawlh hahdamtir a, Mario Gotze chu bench-ah a ṭhuttir bawk.

Bayern hian FIFA World Cup champion player pathum leh Copa America champion player bakah UEFA best player in Europe lo ni tawhte chawlhtir chungin team khauh leh ṭha tak an la nih zia an la pholang thei tho a ni.

Inkhel dangah Hoffenheim chuan kum 2014 March thla hnua a vawi khat nan league-ah a zawnin hnehna an chang ve leh ta a, Bundesliga manager naupang ber kum 28-a upa Julian Nagelsmann-a naute hian kar hmasaa Wolfsburg 1-0 a an hneh hnuah Inrinni zan khan Andrej Kramaric, Kevin Volland leh Eduardo Vargas te goal khat ṭheuh khung hmangin Hamburg chu 3-1 in an hneh ve leh.

Hoffenheim hian point 27 hmuin 16-naah an awm mek. Hoffenheim hian an chunga awm Augsburg leh an hnuai chiah awm Eintracht Frankfurt nen an point hmuh zat a inang.