MCL top 4-a chiang hnai

Inrinnia Suaka Cricket Ground-a Mapuia Cricket League inkhelah Chhinga Veng CC chuan an khingpui Zarkawt Lords chu run 10-in an hneh a, Chanmarians CC-in an khingpui Chaltlang SC chu run 22-in an hneh ve bawk.

Heti hian table-ah Chhinga Veng CC sang berin point riat an hmu a, pahnihna leh pathumnaah point ruk hmu ve ve Chanmarians CC leh Chaltlang SC-te an awm. Chanmarians hi net run rate-a an san zawk avangin pahnihna an ni a, palina chu Armed Veng Cricket Club an ni.

Vawiin hian Chaltlang SC leh Armed Veng CC-ten league match tawp ber an khel dawn a, Chaltlang an chak chuan table-ah pahnihna dinhmun luah thei dinhmunah an la ding a, an chak chian viau chuan pakhatna thlenga invawrh chho thei an ni. Armed Veng erawhin semifinal ticket an la nemngheh loh chuan chhiarkawp danin Zarkawt Lords-in an lehpel thei a, amaherawhchu tun dinhmuna an net run rate thlirin an tlakhniam erawh a rinawm tawh lo.

Inrinni Inkhel

Coin toss-a vannei Chhinga Veng CC-in bat hmasak an thlang. Opening pair Abhay Joshi leh Saidul Alal Faruk-te'n ṭum dang ang bawkin bul an
ṭan ṭha a, Abhay hian run 30 a vaw chhuak a, Saidul hian run 41 a vaw chhuak bawk. Chhinga Veng CC chaptain Jonathan Lalbiakkima pawhin ball 22 lekah run 33 a rawn thawh chhuah pui hman a, over 20 chhungin Chhinga Veng hian run 144 siamin wicket nga an hloh.

Zarkawt Lords ope-ning batsman Michael Lalchhuan-awma (run 27) leh an state pawn player Zahir Uddin (run 77)-te'n run siam nual mah se an ball neihin a daih zo ngang lo, over 20 an bat chhungin mi pathum an out a, run 134 chiah an tlin theih avangin Chhinga Veng hi run 10-in an chak a ni.

Match hnuhnung zawk-ah Chanmarians-in tun tourna-ment-a hneh loh la nei miah lo Chaltlang SC chu run 22-in an hneh. Toss-a vannei Chanmarians-in bat hmasak an thlang a, beisei angin bul ṭan ṭha lo mah se an middle order batsman-te'n chhanhimin over 20-ah wicket kua hlohin run 132 an siam. Chaltlang-in an target an umna kawngah bul an ṭan ṭha chho mah se a tawp an khar ṭha lo. Over 19.2-ah run 110 siamin an out fai vek a, run 22-in an chak lo.

Engtin zel?

League round zawh hian a sang palite'n Qualifier leh Eliminator round an khel chho tawh ang. League-a pakhatna leh pahnihnain Qualifier 1 an khel ang a, heta chak zawk zawk hian final an lut nghal anga a chak lo zawkin Qualifier 2 an khelh a ṭul ang.

Hetihlai hian league-a pa-thumna leh palina te'n Eliminator an khel dawn a, he round-a chak lo zawk hi chu an tla nghal ang a, a chak zawk hian Qualifier 1-a chak lo zawk nen Qualifier 2 an khel ang. Qualifier 2-a chak hian Qualifier 1-a chak zawk nen final nen final an khel ang.

Team Dinhmun

# Team Name Matches Won Lost N/R Points Net RR For Against

1 Chhinga Veng CC 5 4 1 0 8 1.5829 648/93.2 536/100.0

2 Chanmarians CC 5 3 2 0 6 0.7324 565/96.1 480/93.2

3 Chaltlang SC 4 3 1 0 6 -0.091 418/78.0 436/80.0

4 Armed Veng CC 4 2 2 0 4 0.675 514/80.0 460/80.0

5 Zarkawt Lords CC 5 2 3 0 4 -0.5879 478/100.0 535/99.4

6 Kulikawn CC 5 0 5 0 0 -2.0819 377/100.0 553/94.3