Inter leh Roma inhnehtawk

Inter Milan chuan AS Roma chak kaltluang lai an tih tawp sak a, Roberto Mancini naute hi a zawna league match riat chhung ngawt hnehna chang zawn tawh Roma nen hian Stadio Olimpico-ah 1-1 in an inhnektawk.

Inrinni zan Serie A inkhelah mual-neitu lam tan Ivan Perisic chuan second half ṭan tirhah goal hmahruai a khung a, Radja Nainggolan-a'n minute 84-naah an si phruh a sut hram a, goal dang a lut zui lo. Kum 2008 hnu lamah Inter hian Roma khelmualah hian hnehna an la chang lo a ni.

Roma hian point 60 hmuin league table-ah pathumna an ni mek a, season thara Champions League khel thei dinhmunah an ding mek. Hetihlai hian Inter pawhin Europe-a inlan la inbeisei ve zelin point 55 hmuin palina dinhmun an luah mek a ni. Serie A aṭang hian a sang pathumin Champions League an khel ṭhin.

Inter manager Mancini chuan, "Match riat khelh hmabak kan la nei a, Roma nen kan inthlauhna hi point nga chauh a nih avangin a sang pathum zinga tel theihna kawng a la inhawng zau hle. Mauro Icardi, Rodrigo Palacio emaw Stevan Jovetic emaw kan nei a nih chuan beiseina kan nei sang ngam tur a ni," tiin tuna an dinhmun aia sang thlen theih a beisei hle.