Leicester-in nomawi hawiin lei dawh zel

Premier League champion lai Chelsea khelmual Stamford Bridge meuh pawh a chim theih season-ah chuan, Leicester City nomawi panna lei dawh mek hi a nghet bik lo ang. Chutihrualin Foxes-in an bungraw mamawh ber point thum an sual chhuah zel avangin Claudio Ranieri hoten an tum ram an hnaih zel a, season tira ringlo mite pawh ringtuah an siam tawh.

Selhurst Park-a Leicester City-in point thum an hlawhchhuah theih nan goal awmchhun khungtu Riyad Mahrez leh Crystal Palace tlarhma tibeidawngtu defender Wes Morgan te an ṭangkai hle. Foxes hian point 66 hmuin league hmahruaitu an ni a, nizan lamah Tottenham Hotspurs-in AFC Bournemouth an hneh a nih pawhin Italian manager Ranieri hote hian point ngain hma an la hruai tho ang.

Mahrez leh goal

Claudio Ranieri leh Alan Pardew te'n ṭum danga an luhtir ṭhin player-te bawk an hmang a, 4-4-2 hmangin an player-te an rem ve ve. Palace left mid-fielder Joe Ledley-a'n Foxes star Mahrez ven harsa a ti a, coach Pardew-a'n second half
ṭantirhah Martin Kelly leh Bakary Sako te hmangin mual vei lama player-te rawn thlak hlawk mah se a pawi tur ang a pawi zo tawh.

Minute 34-naah England tan a koh thar Danny Drinkwater chuan ram tana a khelhpui tur Jamie Vardy chu pein, English striker cross chu Mahrez-a'n chiang zetin a pet lut. Algerian winger hi a chang chuan a nem mah mah ni te pawhin lang
ṭhin mah se inkhel timawitu mai ni loin team pawt kaltu a ni tih lantirin a hun takah a rah leh ṭhin.

Inkhel pumpui thlir chuan Palace-in point hmuh an phu a, Wilfried Zaha leh Sako te finishing ṭhat tawk loh an tuar. Hun tawp dawnah Damien Delaney-a'n crossbar a pet per a, an vanneih ṭum a ni lo.

Palace hian FA Cup semifinal lut mah se December 19-a Stoke City an hneh hnuah league-ah chak an la nei lo. English league sang pali zingah Palace chiah hi kumina mahni khelmuala chak result la nei lo awmchhun an ni.

UCL a chiang?

Leicester manager Claudio Ranieri chuan, "Kan fan-te pawhin hla ṭha tak an nei ta a, mahse kan chi ai loh a ngai a ni. Premier League match hi chu a harsa lutuk a, eng match-ah pawh hian chak zawk tur a hriat theih loh. Champions League kan hnaih a, theihtawp kan chhuah zel ang. Match hnih kan khelh leh hunah chuan a aia sang zawk pawh kan sawi thei mahna," tiin champion a la sawi ri duh lo.

Foxes hian Europe-a inelna sang ber Champions League khel turin an hnuaia club-te an chak vek a nih pawhin vawi thum chak chiah an mamawh tawh.

Leicester hian league match hnuhnung pangaah 1-0 in vawi li an chak a, team khawih chhe pha tur player pawimawh inhliam an nei lo a, tun season-ah penalty vawi 10 an hmu tawh bawk. Chutichung chuan Palace boss Pardew chuan a hneh lohte famkim lohna lai hmu loin an ṭhatna lai a hmu lian zawk.

Crystal Palace boss Alan Pardew chuan, "FA Cup-a Reading kan hneh zawhah team boruak tih phur chhoh zel kan duh a, kan duh ang result kan hlawh chhuak lo a, Leicester-in an hmahruaina sawhnghehna hun remchangah an hmang thung. Anni hian game mawi tak an khel a, umphak an har tawh ang, champion an phu a ni," tiin an Leicester a fak.

Foxes leh nomawi

Leicester hian an match khelh hmabak pasarih zinga a hmasa paruk Southampton, Sunderland, West Ham, Swan-sea, Manchester United leh Everton te an hneh vek chuan an champion chiang ang. Foxes hian match khat khelh hmabaka an champion tih an nemngheh theih chuan league dan angin Stamford Bridge an tlawh hunah champion lai Chelsea player-te'n Leicester player-te hi zahna (guard of honour) an lantir ang. Tun hmaa mang lamah pawh an suangtuah phak loh kha a takin a thleng thei tawh a, Foxes hian nomawi an chawi lo a nih chuan mak titu an tam tawh zawk hial ang.

Season liam ta khan Foxes hian vawi 31 khelh zawhah point 25 an hmu a, table mawgphahah awmin hmahruaitu Chelsea an phak lohna chu point 45 zet a ni. Kum khat chhung leka thil inthlak danglam nasat dan hi hriatthiam har a, Leicester supporter-te pawhin an la tawn ngai loh ram hi nuam an ti hle.

Palace an hneh ṭum hian Selhurst Park-ah second half ṭantirh aṭanga inkhelh ban minute 20 hnu thlengin 'League-ah kan champion dawn' tihin an zai rual a, thuneituten stadium aṭanga chhuak turin an ngen hial a, an club history-a an la tawn ngai loh an tawn mek avangin an chet dan hi a mak lo.