Vawiinah MFA Cup semifinal

2016 MFA Cup semifinal chu vawiin hian Khawtetlang Field, Serchhip-ah khelh a ni dawn. Group A hmahruaitu Champhai DFA aiawh Zotlang FC leh Siaha FC ten chawhma dar 11:30-ah semifinal hmasa zawk an khel ang a, chawhnu dar 1:30-ah Chhinga Veng FC leh New Serchhip FC te'n final lut tur an zawng bawk ang.

Group B lam

Inrinni khan group match hnuhnung ber khelh a ni. Chhinga Veng FC-in Hmingthanmawia Hmar goal hmangin Siaha FC 1-0 in an hneh a, Group B hma-hruaitu an ni. Aizawl DFA champion Chhinga Veng hian group stage-ah an khingpuite an hneh vek a, Champhai DFA aiawh Zotlang FC pumpelhin semifinal lut zinga a nem ber tura ngaih New Serchhip FC an hmachhawn ang.

Match hnuhnung zawkah Young Learners FC leh FC Rengkhawpui te in-khelhin beisei tur nei lo mah se point la hmu lo an nih avangin inkhel a nung ṭha hle. Lawngtlai aiawh Young Learners-in bul ṭan ṭha mah se hun tawpa vannei zawk erawh FC Rengkhawpuia an ni a, injury time-ah F. Lalnunhlua'n chakna goal a khung.

Young Learners tan hian C. Samuel Touthang leh Lalremmawia ten goal hnih ve ve an khung a, Vairengte club FC Reng-khawpui tan K. Zomuanawma'n hattrick a siam a, chakna goal khungtu F. Lal-nun-hlua'n goal hnih a khung bawk. Lawngtlai khaw club Young Learners chu MFA Cup 2016-a point hmu lo awmchhun an ni.

Semifinal thlirlawkna

Champhai DFA aiawh Zotlang FC hi coach K. Lalbulliana'n a enkawl a, MSL1-a Dinthar FC champion ṭuma defender ṭha Ramnunsanga chu player pawimawh a ni.

Zotlang FC hi Group A hmahruaitu an ni a, MFA Cup-ah 100% chak record an nei mek. Champhai club tan hian Lalhmuchhuaka'n goal thum a khung tawh a, Zonunthara leh John Lalnunmawia te'n goal hnih ve ve an khung tawh bawk.

Siaha FC hian group match hnuhnung berah red card hmuh vanga player pakuaa a khel Chhinga Veng a hneh loh avangin final lut turin Zotlang FC an hmachhawn a ṭul phah dawn. Siaha FC hian tun inel-naa goal nga khung tawh striker MC Mal-sawmzuala bakah FC Kulikawn midfielder hlui midfield laia Beihruaikhai leh Zo United defender hlui HC Ricky te an kawl avangin Zotlang hmaa zam tur an ni bik lo.

Chhinga Veng-in Siaha an hma-chhawn ṭuma red card hmu goalkeeper Vanlalawmpuia leh defender Lalnunfela te an chhawr thei dawn lo mah se New Serchhip hneh turin an ṭha tawk. Chutih-rualin New Serchhip hi inelna thlengtu an nih avangin Chhinga Veng an barakhaih thei a, amaherawhchu Champhai club Zotlang FC laka 4-0 ngawta an tlawm avangin hnehna an chang a nih chuan upset-ah a chhiar theih ang.