Siami hoin India an champion

Lalremsiami Hmar telna India hmeichhe hockey team chu Jharkhand Women's Asian Champions Trophy 2023 khelh zawh takah an champion, hlawhtlinna an chan theih nan Mizo nula hian a thawhhlawk hle.

Marang Gomke Jaipal Singh Hockey Stadium, Ranchi-ah Pathianni khan a hmawrbawk a ni. India hian champion lai Japan chu 4-0 a hnehin hlawhtlinna an chang a, final-ah hian Mizo nula Remsiami'n goal khat a khung.

Remsiami bakah hian Sangita Kumari, Neha Goyal leh Vandana Katariya ten goal khat ṭheuh an khung. India hian Asian Games-ah khan gold medal la phak ta chiah lo mah se an insiamrem leh nghal. Tunah chuan Paris Olympic 2024 khelh ngei tumin hmalam an thlir chhunzawm dawn a ni.

Tournament-ah hian team paruk an tel a, team tin hi an inkhel kual hmasa vek. India hian China (2-1), Japan (2-1), South Korea (5-0), Malaysia (5-0) leh Thailand (7-1) te an hneh vek a, chumi hnuah a sang zual pali ten semifinal an khel.

India tan harsatna a awm lo, semifinal-ah Korea chu si hnih faia hnehin nomawi inchuhna inkhelah pawh harsatna an tawk lo. Kolasib nula Siami hian tun tournament chhungin goal li a khung a, player pawimawh bik zinga mi a ni.

Remsiami chuan, "A vawi khat nan India tan Asian champion trophy ka chawi ve thei ta. Damna leh hriselna min pe tu Pathian chungah ka lawm. Pathian ropui ber zel rawh se," tiin Vanglaini a hrilh a, Mizo mipuiten an ṭawngṭaipui ṭhin avangin a thlamuang tih a sawi bawk.

India rama hockey thuneitu sang Hockey India chuan champion team player zawng zawng hi Rs 3,00,000 ṭheuh an pek tur thu an puang nghal. Asian Games neih zawh taka bronze medal an lak avangin Rs 3,00,000 ṭheuh an lo pe tawh bawk a ni.