MPL10 Second Phase : 9 Days to Go Chanmari FC dinhmun a ṭha

Zote Toyota MPL10 chu November 16, Ningani aṭangin khelh chhunzawm a ni dawn a, Chanmari FC-in match sarih aṭanga point 17 an hmuh tawh avangin semifinal lut turin an dinhmun a ṭha hle. MFA thuchhuahin a tarlan danin MPL10 hi kumin chhunga zawh tum a ni.

MPL khelhna tawhna thlirin league round-a point 20 hi semifinal luh nan a ṭha tawk a, K. Malsawmkima kaihhruai team tan match sarih aṭanga point thum hmuh hi thil harsa niin a lang tawh lo. Chutihrualin, Mala hote hian semifinal khelh ringawt an tum lo a, champion an tum. September 26, Thawhlehnia MPL10 phase 1 khelh zawh a nih khan hun rei lote chawlin training an ṭan lehnghal a, inelna hmachhawn an cho khawp ang.

MPL ṭantirh aṭanga season tina la inlan Chanmari FC hian champion ngei an tum a, club hotute inpekna pawh a sang hle. Kumin hian player langsar Lalkhawpuimawia an lalut thei a, hei hi Mizoram team pawhin ṭangkaipuiin Santosh Trophy group stage-ah inelna pumpuiah top scorer a ni hial. Mizoram captain Lalrinchhana Tochhawng chu Chanmari FC captain a ni a, CFC hian Uttarakhand laka chakna goal pawimawh khungtu Laltlanzova an kawl bawk.

Chanmari FC hian H. Vanlalthlanga leh Lalsangzuala Hmar te hnuaiah MPL nomawi an chawi tawh a, coach Mala hnuaiah a lungthu kim nan champion ngei an tum. Chutihrualin, MPL-a champion hi a awlsam lo a, Mizoram coach Sanga enkawl Chhinga Veng FC pawh tun dinhmunah a sang pali zingah an awm lo. Champion lai Chawnpui FC, Mizoram Police leh I League club Aizawl FC te an la awm bawk avangin nomawi chawi tur hriatthiam a la har a, inelna nung ṭha tak hmuh tur a awm tih erawh a chiang hle.