Grace-i'n Odisha gold medal a lakpui

37th National Games 2023-ah Mizo nula Grace Lalrampari telna Odisha chuan hmeichhe football final-ah Manipur hnehin gold medal an la. Mizo hmeichhe footballer tana kawng sialtua chhal theih Grace hi Hero Indian Women's League (IWL)-ah Odisha FC tan a khel a, National Games-ah Mizoram team an tlin loh avangin Odisha tan a inlan.

Odisha hi group B-ah Chandigarh, Haryana leh Goa te nen an awm a, match hmasa pahnihah Grace-i hian bul ṭanin semifinal an luh nghal avangin match tawp berah hahdamtir a ni.

Salem Veng nula Grace-i hian semifinal-a West Bengal (0-0) leh final-a Manipur (1-1) an hneh ṭumin a khel tluan ve ve a, penalty shootout-a an chak theih nan goal a khung ve ve bawk. Grace-i hi defensive midfield-ah a khel a, match nga khelh theihah match li khelin goal khung lo mah se assist ṭum hnih a nei a ni.

Odisha-ah hian Grace-i bakah hian state dang Maharashtra leh Manipur a mi an awm a, an coach Chrispin Chhetri hi Odisha FC-a an coach a ni nghal bawk. Grace-i chuan, "Sethu FC tana ka khelh lai aṭangin kan coach Chrispin Chhetri nen hian kan inzui tawh a, Odisha lamah pawh kan inzui zel. Min duhsak avangin a chungah ka lawm hle a ni," tiin Vanglaini a hrilh.