Point hmu tura vanneihna mamawh Liverpool

Luton Town khelmualah chak tur chiang saa ngaih Liverpool an lenglut a, mahse, point khat hlawh chhuak turin vanneihna an mamawh thung. Hun pek belha Luis Diaz goal khung hmangin Luton chu 1-1 in an inhnehtawkpui hram.

Premier League kai thar Luton hian Tahith Chong hmangin minute 80-naah goal hmahruai an khung a, Chong-a goal khung hun ngaihtuahin chak mai beiseina pawh an nei lian hle.

Mahse, a pa an rukbo avanga tun hnai match hnih khel thei lo Luis Diaz chuan Liverpool tan si phurh a sut a, an hmachhawn hma league match 10-a vawi khat chiah la chak Luton laka an mualpho lutuk tur chu a team a chhanhim.

Nunez = Nil

Liverpool vanneih zan ni se, goal tam zawk khung a, hnehna chang thei tur an ni a, mahse, tlarhma lamah Darwin Nunez ke a hmui tawk lo - Uruguayan striker hian vawi kua zet chance a nei a, mahse, heng zinga pathum chiah hi target zawnah a kal.

Nunez-a'n goal a khung teuh ber chu crossbar a tihper kha a ni a, Mohamed Salah-a'n ṭha zeta ball a siamsak chu yard ruk vel lek aṭangin a ti goal thei lo bawk. Diogo Jota leh Cody Gakpo te pawhin an chance neih duhawm bik an chhawr lo.

Luton tan Republic of Ireland winger Chiedozie Ogbene a hmuhnawm a, Liverpool fullback chhuan em em Trent Alexander-Arnold a chhaih mangang ngun hle.

Vanneihna

Luton lamin a venhim hna an thawh avangin an hlawhtling a tihtheih a, minute 80-naa Chong hmanga goal an khung phei kha chuan an beisei ngam loh result an mitthla hman hial ang - a awm lo hran lo.

Mahse, Liverpool-in inkhel thlak danglam thei player an nei a, a hming chu Luis Diaz a ni. Colombian forward hian hun harsaah pawh a team tan a theihna a hlan chhunzawm a, hun pek belh minute nganaah si phurh sutna goal a khung.

Diaz-a'n a kawr hnuaia thuziak pholangin a goal khung a lawm zui a, "Ka pa tan zalenna," tih chu a kawrah hian a inziak. A pa rubotute chu a pa chhuah zalensak thuai turin a ngen a ni.

Ka pa tan

Diaz hian inkhelh zawhah ruk bo mek a pa chhuah zalen turin a ngen zui a, kum 26 mi forward chuan, "Second tin, minute tin hian rilru hah reng rengin hun kan hmang a ni ber.

"Ka nu leh ka unaute nen hrehawm kan ti a, kan hrehawmna hi thua sawifiah kan thiam lo. Inah kan hnenah ka pa hi awm se, hrehawm kan tihna hi chu a reh chauh ang. Ka pa hi rang taka inchhuah zalen ka ngen a, hrehawm taka a hun hman hi titawp rawh u.

"Hmangaihna leh khawngaihna hmingin ka ngen che u a, ka pa hi lo hawtir hram rawh u," a ti a, Colombia leh khawvel hmun hrang hranga miten an tawrhpuina avangin lawmthu a sawi bawk.