Sawmtea hoin Aizawl FC khel dawn

Aizawl FC head coach Erol Akbay chu mimal harsatna avangin a inhnukdawk a, vawiin tlai dar 4:30-a Mizo club-in Sreenidi Deccan an hmachhawn hunah AFC hi B. Malsawmzuala'n a enkawl ang.

Luangmuala cheng Sawmtea hian football-ah sulhnu ṭha tak a nei a, Mizo forward hmuhnawm zinga tel pha ṭhin hi coaching lamah pawh a che ṭha chho hle.

Hun rei tak Aizawl FC Academy a enkawl hnuin kumin kumtir khan Calcutta League First Division club Kalighat Sports Lovers Association club a enkawl a, a team enkawl hian Premier Division an kai dawn.

Aizawl FC-in an hnuaia contract nei Sawmtea hi acadmey enkawl turin an la let a, first team-in MPL-ah result an neih ṭhat loh avangin senior team enkawltuah a hmang.

MPL7 round 7-ah pawh Sawmtea enkawl AFC-in Project FC chu 6-0 ngawtin an sawp. Chutihrualin MPL leh I League erawh inelna hrang daih a ni dawn a, AFC khingpui tur Sreenidi Deccan hi champion rinkai an nih phak avangin a harsa dawn.

Sreenidi Deccan hian Neroca (4-0) leh Inter Kashi (4-1) lakah goal li ve ve an khung a, goal riat zinga goal li hi Mizo player R. Lalbiakliana (2), Lalromawia leh B. Lalnuntluanga te khung a ni. An striker David Munoz ven uluk a ṭul viau bawk ang.

AFC coach Sawmtea chuan, "Sreenidi hi team ṭha tak an ni a, kan fimkhur hle a ṭul ang. An muala khel tur kan nih bawk avangin tlarhnung kan rem phui ṭhat a ngai a, point hlawh chhuak turin theihtawp kan chhuah ang," tiin Vanglaini a hrilh.