Silly Point: ADVANCE DIWALI

Mizoten a hun tak tak thlen hma ngawt si a, kan hman uar leh hlimpui deuh chu Advance Krismas a ni. Diwali hi tun Pathianni daih hi a la ni nangin, India Cricket erawh kan Advance Diwali ṭan der chu a ni mai awm e.

Mahni ramri kham chhunga Saipui kal lai Hamara Desh team chelh ding zo reng an la awm lo a. A ni, a hmazawna lo ding apiang chu an vai hma zel a, an 'bulldozz' fai vek zel mai a ni ber!

Birthday Boy Kohli

Cricket Hall of Fame a arsi langsar ber zinga mi ni reng tawh tur, India kaptan kal chhuak Virat Kohli-a'n kum 35 lawm nan, ODI bika century vawi 49-na a vaw chhuak. Ṭum danga, Kohli 100+ strike rate nena century lian tak nena thleng chu a ni hauh lo.

Mahse a chhehvela wicket tla leh team dinhmun hre rengin, a experience zawng zawng fawm khawmin, a 'quality' zawnga thlir pawhin a century lo siam tawh zawng zawng aia a hniamna bik a awm mawlh lo.

Thawcham ching Proteas

Kan sawi ṭhin, kan sawi nawn fo dawn nge? Kumin world Cup-ah pawh hmakhawsang aṭanga South Africa team nena sawizawm hlawh fo - irhfiak, thawchham, tawlhthluk khut ching tih chu la dik tlat. Tun Pathianni zan zet kha zawng, Temba Bavuma leh a naute tan zan lungngaithlak a ni teh meuh mai.

Silly Point hmasa lama kan lo thailan ang chiahin, South Africa team chu Quinton de Kock a khelh ṭhat leh ṭhat lohah thui tak a innghat. Tun Pathianni zanah erawh India thiampuipa Jasprit Bumrah-a'n over hmasa bera De Kock a vawm hlum aṭang kha chuan, inkhel chanve zo ang a nihna chin a awm. Run 326 um ngai chunga, team innghahna ber over hmasa bera a thih tawh chuan, kawng chho a mi 4-5 velin road roller namkal tum ang lek a ni.

Aw Jaddu

Player langsar leh statistics en mai chuan mit la zawk tamtak kara, langsar em em lo, team hnuk ni tlat si. An inkhelh chuan an pawimawhzia kan enkan fo, an inkhelh loh chiaha team tana an lo pawimawh zia kan hriatchhuah leh si ṭhin te hi an awm. Chung huang chhungah chuan India all rounder Ravindra Jadeja hi kan dah thei ang.

A vei vawm spin kha South African batsman ten khelh ngaihna an hre thlawt lo a ni ber a. A tawp score chauh en tan phei chuan professional leh amateur team an intum ta emaw tih mai tur a ni.

Fans tam zawk stadium pan chhan chu Kohli, Rohit Sharma, Bumrah, Mohammed Shami etc te che tla vel en tum vang a ni nameuh mai. Amaherawhchu, i thih leh dam inkar a, i aiawha khel tur mi pakhat chauh thlang rawh ti dawn ta se, mi tamzawk chuan Jaddu a hi an vote deuh vek mai lo maw?

Election ni hman nuam vek u le.