Roma chakna Lukaku

Inkhel tir lamah penalty a hlah a, mahse hun tawp dawnah chakna goal a khung thung - AS Roma chuan hun tawp dawna Romelu Lukaku goal hmangin Lecce 2-1 in an hneh a, season bul an ṭan fuh lohna an siamṭha zel.

Pathianni zan Serie A inkhel dangah Juventus chuan Fiorentina 1-0 in an luhchhuah. Old Lady goal neihchhun hi minute 10-na leka Fabio Miretti goal khung a ni a, pawn lam buaina nei ṭhin mah se Juve hian champion an la tum ngam.

Jose Mourinho enkawl Roma lamin duhthusama bul ṭan theihna nei mah se, striker Lukaku-a penalty pet chu Lecce goalkeeper Wladimiro Falcone-a'n a lo dansak. Italy ramah Lukaku hian penalty vawi 15 a pet tawh, a hlah vawi khatna a ni hial.

Lecce tan Lameck Banda-a'n minute 71-naah goal khung an hum tluan teuh hle, minute 90+1 a rikin Sardar Azmoun hmangin Roma lamin an sut a, hamrik hnuhnung ber rik hma chiahin Lukaku-a'n hliam dam hlim Paulo Dybala hnen aṭanga a ball hmuh khungin a team a chakpui.

Roma manager Mourinho chuan, "Italy ramah chuan Lukaku-a'n penalty a hlah vawi khatna a ni, kan thawhdun tawhnaah erawh vawi hnih a hlahna a ni thung. Tun hma khan Chelsea tana kan thawh laiin a lo hlah tawh.

"Dybala kha hliam dam hlim a ni a, mawhphruhna lian la turin a la inringtawk lo. Chuvangin Lukaku chungah mawhphurhna a tla," tiin penalty pet dan chungchang a sawi a, a striker chu hmangaih taka enkawl ngai a nih thu a sawi tel bawk.