Real-in goal an khung lo

Pathianni zan La Liga inkhelah Real Madrid-in goal an khung lo a, an mikhual Rayo Vallecano nen 0-0 in an inhnehtawk - Santiago Bernabeu-ah Real an chak zawh loh avangin table chung berah Girona an awm chhunzawm a, Real nen match 12 ve ve khelh tawhah point hnihin an inthlau mek.

Girona hian Inrinni zan khan Osasuna chu 4-2 in an hneh a, hei vang hian Real-in chak an mamawh. Mahse, Federico Valverde, Joselu, Jude Bellingham leh Vinicius Jr ten an chance neih an chhawr thei lo vek a, Bellingham-a'n hliam tenau a tuar bawk.

Kum 20 mi Bellingham hi a dar hliam vangin enkawl a ngai a, inkhel zui thei mah se ṭum dang angin game hmuhnawm bik a chhawp chhuak thei lo. Real boss Carlo Ancelotti chuan, "A hliam kan endik ang a, hliam na tak a nih loh kan beisei," a ti a, he thu buatsaih a nih lai hian a dinhmun chiang taka sawina a la awm lo.