A vawi 17 nan Verstappen a chak

Formual 1 tun season zet chu Max Verstappen elphak leh amah tibuai phak an awm lo a ni ber mai. Red Bull driver hian Sao Paulo Grand Prix-ah hnehna a chang leh ta, kuminah vawi 17 tehmeuh a chak tling ta a ni.

Red Bull driver hian champion nomawi a kawl lai a humhim fel daih tawh, mahse chawlh zai a la rel chuang lo. Dutch thlangval hi amah hnaih bertu McLaren driver Lando Norris aiin second 8.2 in a thleng hmasa zawk.

Anni pahnih hnungah hian beisei phak baka season hmang ṭha Fernando Alonso a thleng. Aston Martin driver hian point 198 hmuin driver championship lamah pawh palina a ni phak a, a chungah hian point 226 neitu Lewis Hamilton a awm.

Red Bull team hotupa Christian Horner chuan, "Max-a hian a tih tur a hlen ṭha ṭhin takzet, amah chuan car a neih ṭhat thu sawi ṭhin mah se, driver kan neih ṭhat vanga hetiang thleng kan ni," tiin an driver a dahsang thiam hle.

World champion vawi sarih ni tawh Hamilton chu pariatna a ni a, season hmasa aṭang khan Britian tlangval hian chak ni hmel a la hmu lo. Tun season tawp hmain Las Vegas leh Abu Dhabi Grand Prix te an la tlan dawn, vawi khat tal chak ngei a tum ang.