Pep-a'n inkhelh châka tuihal turin a duh

Manchester City chuan zanin dar 1:30 hian Champions League-ah Young Boys an mikhual dawn a, Premier League champion lai hian hnehna an chang a nih chuan knockout stage an lut tawh dawn.

Season liam taa treble champion Man City hian duhthusamin season bul ṭan ṭha lo mah se Premier League leh Champions League-ah an khel a nghet ṭha leh tawh a, nomawi humhim turin an dinhmun a ṭha. Kartawp inkhelah Bournemouth chu 6-1 tehmeuhin an sawp a, player thar Jeremy Doku-a'n hattrick a siam.

Manchester Derby-ah Doku hi bench-ah a awm a, Bournemouth a hmachhawn ṭumin derby-a bul ṭan Jack Grealish chu bench-ah a awm leh thung.

Guardiola chuan, "Jack Grealish hi a khelh loh avangin thinur se, chu chu khelmualah rawn lantir se ka duh. Doku pawh match hnih a khel lo a, hei vang hian khelhna remchang a neih hunah ṭha takin a khelh phah," tiin tiin player-te chu inkhelh châka tuihal turin a duh.

Doku hian nipui bazarah pound maktaduai 55.4-in Rennes aṭangin an lalut a, City tlarhma a tihchak phah hle. Young Boys an hmachhawn hunah hliam vanga Erling Haaland a inlan thei lo a nih pawhin Julian Alvarez an neih bakah a thlawptu tur an neih ṭhat avangin buaina an nei lo ang.